अक्षय बडवे, साम टीव्ही

पुणे: लग्नास नकार दिल्याने प्रियकराने केलेल्या चाकू हल्ल्यात गंभीर जखमी झालेली २२ वर्षीय तरुणी रुग्णालयात मृत्यूशी झुंज देत आहे. तिची प्रकृती अत्यंत चिंताजनक असल्याचे सांगण्यात येत आहे. पुण्यातील चंदननगरमध्ये मागील आठवड्यात ही घटना घडली होती. तिच्या घरात घुसून आरोपीने चाकूने वार केले होते. याप्रकरणी पोलिसांनी आरोपीला अटक केली आहे. पीडित तरुणी आणि तिचा कथित प्रियकर हे दोघेही पुण्यातील एका नामांकित मॉलमध्ये काम करत होते.

मिळालेल्या माहितीनुसार, आरोपी दिलीप राठोड आणि पीडित तरुणी पुण्यातील एका नामांकित मॉलमध्ये एकत्र काम करत होते. कामाच्या ठिकाणीच दोघांची ओळख झाली आणि मैत्रीचे रूपांतर प्रेमात झाले. मात्र, काही दिवसांपूर्वी तरुणीच्या कुटुंबीयांनी तिचे लग्न दुसऱ्या एका तरुणाशी निश्चित केले होते. ही माहिती तरुणीने आरोपीला दिली आणि "माझ्या घरच्यांनी लग्न ठरवले असल्याने आपण आता पुढे नको जायला, असे स्पष्ट केले.

घरात घुसून केला हल्ला

आपल्या प्रेयसीचे लग्न दुसऱ्याशी ठरल्याचा राग आरोपी दिलीप राठोडच्या मनात होता. याच रागातून २९ एप्रिल रोजी रात्री ८:३० च्या सुमारास त्याने तरुणीच्या घरात प्रवेश केला. तिथे त्याने तरुणीशी वाद घालून तिला शिवीगाळ करण्यास सुरुवात केली. वादाचे रूपांतर हाणामारीत झाले आणि संतापलेल्या आरोपीने आपल्या जवळील चाकूने तरुणीच्या गळ्यावर सपासप वार केले.

आरोपी अटकेत, तरुणीची प्रकृती गंभीर

या हल्ल्यानंतर तरुणी रक्ताच्या थारोळ्यात पडली होती. तिला तातडीने जवळच्या रुग्णालयात दाखल करण्यात आले. मात्र, आठवडा उलटूनही तिची प्रकृती अद्याप गंभीर असून डॉक्टर तिचे प्राण वाचवण्यासाठी शर्थीचे प्रयत्न करत आहेत. चंदननगर पोलिसांनी या घटनेची गांभीर्याने दखल घेत तातडीने कारवाई करत आरोपी दिलीप राठोडला बेड्या ठोकल्या आहेत. पोलीस या प्रकरणाचा अधिक तपास करत आहेत.