सागर आव्हाड, पुणे

पुण्यातून मोठी बातमी समोर आली आहे. बुधवार पेठ रेड लाईट परिसरात फरासखाना पोलिसांनी मोठी कारवाई करत अवैधरित्या भारतात वास्तव्यास असलेल्या पाच बांगलादेशी महिलांना ताब्यात घेतले आहे. या कारवाईमुळे परिसरात एकच खळबळ उडाली असून पुणे पोलिसांच्या अवैध बांगलादेशी नागरिकांविरोधातील मोहिमेला आणखी वेग मिळाल्याचे दिसून येत आहे. विशेष म्हणजे, गेल्या ११ महिन्यांत पुणे शहर पोलिसांनी पकडलेल्या बांगलादेशी नागरिकांची संख्या आता ९४ वर पोहोचली आहे.

पुणे शहराचे पोलीस आयुक्त अमितेश कुमार यांच्या आदेशानुसार, शहरात अवैधरित्या वास्तव्यास असलेल्या परदेशी नागरिकांविरोधात विशेष मोहीम राबविण्यात येत आहे. त्याच मोहिमेअंतर्गत फरासखाना पोलीस स्टेशनचे प्रभारी वरिष्ठ पोलीस निरीक्षक प्रशांत भस्मे यांच्या मार्गदर्शनाखाली बुधवार पेठ परिसरात विशेष कोंबींग ऑपरेशन करण्यात आले. हे ऑपरेशन रात्री १ वाजल्यापासून सकाळी ९ वाजेपर्यंत सुरू होते.

कारवाईदरम्यान पोलीस उपनिरीक्षक अरविंद शिंदे यांना गुप्त माहिती मिळाली की, बुधवार पेठेतील माचिस बिल्डिंग परिसरात काही बांगलादेशी महिला अवैधरित्या राहत आहेत. मिळालेल्या माहितीच्या आधारे पोलिसांनी तात्काळ छापा टाकला. यावेळी पाच महिलांना ताब्यात घेण्यात आले. पोलिसांनी त्यांची चौकशी केली असता त्या बांगलादेशातून अवैध मार्गाने भारतात आल्याचे समोर आले.

प्राथमिक तपासात या महिला बुधवार पेठ परिसरात वेश्याव्यवसाय करून उदरनिर्वाह करत असल्याची माहिती उघड झाली आहे. तसेच त्यांच्याकडे बांगलादेशी नागरिकत्वाचे काही पुरावेही आढळून आले आहेत. पोलिसांनी संबंधित महिलांविरोधात परदेशी नागरिक कायद्यानुसार पुढील कायदेशीर प्रक्रिया सुरू केली आहे.

दरम्यान, शहरात अवैधरीत्या वास्तव्यास असलेल्या परदेशी नागरिकांविरोधातील मोहीम अधिक तीव्र करण्यात येणार असल्याचे पोलिसांकडून सांगण्यात आले आहे. या कारवाईत पोलीस कर्मचारी सुनील मोरे, महेश राठोड, वशिम शेख, वैभव कदम, रविंद्र बत्तीशे तसेच महिला पोलीस कर्मचारी राणी शिंदे, पुनम ओव्हाळ, अर्चना ढवळे आणि करिष्मा कडाळे यांनी सक्रिय सहभाग घेतला.