सागर आव्हाड| पुणे, ता. १९ ऑगस्ट २०२४

पुणे शहरातून एक धक्कादायक बातमी समोर आली आहे. पुण्यातील विमाननगर परिसरात असलेल्या फिनिक्स मार्केट सिटी मॉलला बाँम्बने उडवून देण्याची धमकी आल्याने सर्वत्र खळबळ उडाली आहे. याप्रकरणी मेल पाठवणाऱ्याविरोधात गुन्हा दाखल करण्यात आला आहे.

याबाबत सविस्तर माहिती अशी की, पुण्यातील विमाननगर भागतील मॉल बॉम्बने उडून देण्याची धमकी आल्याचा धक्कादायक प्रकार समोर आला आहे. फिनिक्स मार्केट सिटी मॉलमध्ये बॉम्बस्फोट घडवून देण्याची धमकी देणारा ईमेल पाठविण्यात आल्याने एकच घबराट उडाली. याप्रकरणी विमाननगर पोलिसांनी धमकीचा ईमेल पाठविणाऱ्याविरुद्ध गुन्हा दाखल करण्यात आला आहे.

या मॉलमध्ये हिडनस बोन नावाच्या व्यक्तीने ई-मेल करून मॉल मध्ये बॉम्ब ठेवल्याची धमकी दिली होती. मॉलमधील कोणी वाचू शकणार नाहीत. पोगो आणि नोरो मला त्रास देत आहेत,' असे पाठवलेल्या ईमेलमध्ये म्हटले होते. याबाबत पोलिसांनी तात्काळ तांत्रिक तपास सुरू करून धमकीचा इमेल पाठविणाऱ्याचा शोध घेण्यात येत आहे.

दरम्यान, दोन दिवसांपूर्वी नवी मुंबईमधील वाशीमध्येही असाच प्रकार समोर आला होता. वाशी रेल्वे स्टेशन परिसरात असलेल्या इनॉर्बिट मॉलमध्ये बॉम्ब असल्याचा मेल आल्याने एकच खळबळ उडाली होती. या धमकीनंतर संपूर्ण मॉल रिकामा करण्यात आला होता. मात्र तपासामध्ये काहीही आक्षेपार्ह बाब आढळून आली नव्हती.