पुणे, ता. ४ जुलै २०२४

ड्रग्स माफिया ललित पाटील पुण्यातील ससून रुग्णालयातून पळून गेल्यानंतर राज्यभरात खळबळ उडाली होती. या प्रकरणी आता सर्वात मोठी अपडेट समोर आली असून पुणे पोलीस दलातील दोन कर्मचाऱ्यांना शासकीय सेवेतून काढून टाकण्याचे आदेश देण्यात आले आहेत.

याबाबत सविस्तर माहिती अशी की, गेल्या काही महिन्यांपासून पुण्यातील ससून रुग्णालय वादाच्या भोवऱ्यात अडकले आहे. ड्रग्स माफिया ललित पाटीलने पलायन केल्यानंतर ससून रुग्णालय सर्वात चर्चेत आले होते. या प्रकरणाने राज्यभरात खळबळ उडाली होती. आता ललित पाटील प्रकरणात मोठी कारवाई करण्यात आली असून पुणे पोलीस दलातील २ कर्मचाऱ्यांना शासकीय सेवेतून काढून टाकण्याचे आदेश देण्यात आले आहेत.

पोलीस हवालदार आदेश शिवणकर आणि पिराप्पा बनसोडे अशी या दोघांची नावे आहेत. ड्रग्स माफिया ललित पाटील याला ससून रुग्णालयात एक्सरेसाठी घेऊन जाण्याची जबाबदारी या २ कर्मचाऱ्यांवर होती. परंतु हे दोघे ललीत पाटीलसोबत एक्सरेसाठी गेलेच नसल्याचे चौकशीत समोर आले आहे.

दरम्यान, नियंत्रण कक्षास माहिती दिली असती तर पळून गेलेल्या ललित पाटीलला पकडता आले असते, परंतु या दोघांनी वरिष्ठ अधिकारी तसेच नियंत्रण कळवले नसल्याचे चौकशीमध्ये निष्पन्न झाले आहे. त्यामुळे पुणे पोलीस मुख्यालयातील हे दोघे ही कर्मचारी आता सेवेतून बडतर्फ करण्यात आले आहेत.