अक्षय बडवे, साम टीव्ही

पुण्यातून मोठी बातमी समोर आली आहे. पुण्यातील बोपोडी जमीन व्यवहारात मोठा ट्विस्ट निर्माण झाला आहे. बोपोडी जमीन व्यवहार प्रकरणात अमेडीया कंपनी आणि शीतल तेजवानी यांचा संबंध नसल्याचे पोलिसांनी सांगितलं आहे. बोपोडी जमीन व्यवहार प्रकरणात पुणे पोलिसांनी युटर्न घेतल्याचे दिसत आहे. बोपोडी जमीन प्रकरणातून शीतल तेजवानी आणि दिग्विजय पाटील (अमेडिया कंपनी) यांचं नाव वगळण्यात आलं आहे. त्यामुळे दोघांना मोठा दिलासा मिळाला आहे.

पोलीस स्टेशनमध्ये एकाच एफआयरमध्ये दोन जमीनीचे प्रकरणे नमूद असल्यामुळे गोंधळ निर्माण झाल्याचे पोलिसांचं म्हणणं आहे. त्यानंतर पुणे पोलिसांकडून शीतल तेजवानी आणि दिग्विजय पाटील यांना अप्रत्यक्ष क्लीन चिट दिली. या प्रकरणावर पुणे पोलीस उपआयुक्त विवेक मासाळ यांनी भाष्य केलं आहे.

पुणे पोलीस उपआयुक्त विवेक मासाळ यांनी म्हटलं की, खडक पोलिस ठाण्यातील एफआयआरमध्ये बोपोडी जागेची एक घटना आणि मुंढवा मध्ये असलेल्या एका जागेच्या संदर्भात आहे. या दोन्ही घटना वेगवेगळ्या आहेत. बोपोडी मध्ये ६ आरोपी आणि मुंढवा प्रकरणामध्ये शीतल तेजवाणी आणि दिग्विजय असे दोन आरोपी आहेत'.

'बोपोडी जमीन व्यवहार प्रकरणात शीतल तेजवानी आणि दिग्विजय पाटील आरोपी नाहीत. एफआयआरमध्ये दोन तक्रारी नमूद आहेत. यातील एकामध्ये तहसीलदार सूर्यकांत येवले यांचे नाव नमूद असल्याने २ प्रकरणाची एक एफआयआर झाली आहे, असे ते पुढे म्हणाले.