सचिन जाधव, साम टीव्ही

पुणे: हॉटेल मालकाने नवीन मोबाईल घेऊन दिला नाही म्हणून कामगाराने थेट मालकाच्या 75 वर्षीय सासऱ्याच्या डोक्यात हत्याराने वार करून खून केल्याची धक्कादायक घटना पुणे जिल्ह्यात घडली आहे. भोर तालुक्यातील जांभळी परिसरात मंगळवारी ( दि. 24) बुधवारी सकाळी 9 वाजता घडली आहे. या प्रकरणी राजगड पोलीस स्टेशनमध्ये गुन्हा दाखल करण्यात आला आहे. किसन बाप्पु सुर्वे असं या वृद्धाच नाव आहे. सुर्वे हे त्यांच्या जावयाच्या हॉटेलजवळ टपरी चालवत होते. दरम्यान जावयाच्या हॉटेलमधीलचं एका आचाऱ्याने किरकोळ कारणावरून हा खून केलाय.

फिर्यादी अनिल रसाळ यांचे नसरापूर वेल्हा रोडवर 7/12 शेतकरी व्हेज नॉनव्हेज' नावाचे हॉटेल आहे. सागर थापा हा त्याठिकाणी काम करतो. सागरने रसाळ यांच्याकडे मोबाईल घेऊन देण्याची मागणी केली होती. मात्र ती पूर्ण न झाल्याने त्याने राग मनात धरला. रसाळ हॉटेलमध्ये नसताना त्याने सासऱ्यावर बोथट हत्याराने गंभीर वार केले. या हल्ल्यात सुर्वे यांचा जागीच मृत्यू झाला. यानंतर सागर थापा घटनास्थाळावरून फरार झाला.

सागर लक्ष्मण कुमार राणा असं 20 वर्षीय आरोपीचं नाव आहे. मोबाईल न घेऊन दिल्याच्या किरकोळ कारणावरून आरोपीने हॉटेल मालकाचे सासरे किसन बाप्पु सुर्वे (वय ७५, सध्या रा. जांभळी, मूळ रा. भोंगवली, ता. भोर) यांचा डोक्यात धारदार शस्त्राने हल्ला करत खून केला. पोलिसांनी दोन विशेष पथके तपासासाठी तात्काळ रवाना करून अचूक सापळा रचत आरोपी नेपाळला पळून जाण्याच्या तयारीत असताना त्याला पुण्यातील कात्रज चौकातून ताब्यात घेतले. या घटनेचा राजगड पोलिस पुढील तपास करत आहेत.