vaishnavi hagawane news : पुणे जिल्ह्यातील एका राजकीय पुढार्‍याच्या सुनेने गळफास घेत आत्महत्या केल्याने राजकीय वर्तुळात मोठी खळबळ उडाली आहे. पुणे जिल्ह्यातील राजकारणात एक महत्त्वाचं व्यक्तिमत्व असलेले राजेंद्र हगवणे यांची सून वैष्णवी हगवणे हिने 16 मे रोजी मुळशी तालुक्यातील भुकूम येथे राहत्या घरी गळफास घेत आत्महत्या केली. याच वैष्णवी हगवणे प्रकरणात नवनवीन खुलासे उघडकीस होत आहे. पोलिसांनी या प्रकरणी हुंड्यात दिलेली आलिशान फॉर्च्यूनर कार, अॅक्टिव्हा जप्त केली आहे.

मिळालेल्या माहितीनुसार, वैष्णवी हगवणे प्रकरणात धक्कादायक बाबी समोर आल्यानंतर तिच्या आई-वडिलांनी बावधन पोलीस स्टेशनमध्ये राजेंद्र हगवणे, शशांक हगवणे, हगवणे कुटुंबीयातील इतर सदस्या विरोधात आत्महत्येस प्रवृत्त केल्याचा गुन्हा दाखल केला. तसेच या प्रकरणात आता वैष्णवीचा शवविच्छेदन अहवालाचा अहवाल देखील समोर आला आहे. वैष्णवीचा मृत्यू हा मानेभोवती फास लागल्याने झाला. तसेच तिच्या अंगावर धारदार वस्तूने वार केल्याच्या खूप साऱ्या खुणा देखील आढळून आल्या, असं बीजे हॉस्पिटलने दिलेल्या शवविच्छेदन अहवालात नमूद करण्यात आला आहे.

या प्रकरणात आतापर्यंत बावधन पोलिसांनी वैष्णवीचा पती शशांक, आणि सासू आणि नंदेला बेड्या ठोकल्या आहेत. तर वैष्णवीचे सासरे राजेंद्र हगवणे आणि तिचा दीर अजूनही फरार आहे. प्रकरणाची दखल आता राज्य महिला आयोगाने देखील घेतली आहे. त्यानंतर पोलिसांनी देखील कारवाईचा वेग वाढवलाय. शशांक हगवणे याला हुंड्यात मिळालेली आलिशान फॉर्च्यूनर कार, अॅक्टिव्हा बावधन पोलिसांनी आता जप्त केली आहे.

वैष्णवी तिच्या कुटुंबीयांना कायमची सोडून निघून गेली आहे. तिच्या पाठीमागे तिचं दहा महिन्याचं चिमुकलं बाळ देखील आहे. आईविना ते बाळ पोरकं झालं आहे. मात्र निर्दयी हगवणे कुटुंबीयांनी तिचा बाळ नेमका कुठे आहे आणि त्याला कोण सांभाळत आहे, याची साधी माहिती देखील वैष्णवीच्या माहेरच्या कुटुंबीयांना दिली नाही.