Summary:

• पुण्यामध्ये भयंकर अपघात झाला

• कारने सायकल चालवणाऱ्या चिमुकल्याला चिरडलं

• अपघातामध्ये चिमुकल्याचा जागीच मृत्यू झाला

अक्षय बडवे, पुणे

पुण्यातून एक काळीज पिळवटून टाकणारी घटना समोर आली आहे. पुण्यामध्ये ५ वर्षांच्या चिमुकल्याला कारने चिरडले. पुण्यातील लोणी काळभोरमधील ही घटना आहे. चिमुकला सोसायटीच्या पार्किंगमध्ये सायकल चालवत होता. त्याचवेळी भरधाव कारने त्याला चिरडले. या अपघातामध्ये चिमुकल्याचा जागीच मृत्यू झाला. या अपघाताचा थरार सीसीव्ही कॅमेऱ्यात कैद झाला असून याचा थरकाप उडवणारा व्हिडीओ व्हायरल होत आहे. या प्रकरणी कार चालकाविरोधात गुन्हा दाखल करण्यात आला.

मिळालेल्या माहितीनुसार, पुण्यातील लोणी काळभोर भागातील एका जॉय नेस्ट सोसायटीमध्ये ही घटना घडलीय पाच वर्षांचा मुलगा हा सोसाटीमधील पार्किंगमध्ये सायकल चालवत होता. अचानक त्याच ठिकाणाहून जात असलेल्या भरधाव कारच्यासमोर आल्यामुळे आणि चालकाला तो समोर न दिसल्यामुळे कारची त्याला धडक बसली. गाडीचा वेग जास्त होता. त्यामुळे क्षणात होत्याचे नव्हते झाले. कारच्या चाकाखाली चिरडला गेल्यामुळे चिमुकल्याचा जागीच मृत्यू झाला. ही घटना सोसायटीतील सीसीटीव्ही कॅमेऱ्यात कैद झाली.

निष्कर्ष आश्वत स्वामी (वय ५ वर्षे) असं अपघातामध्ये मृत्यू झालेल्या मुलाचे नाव आहे. याबाबत निष्कर्षचे वडील आश्वत नारायण स्वामी (वय ४० वर्षे) यांनी लोणी काळभोर पोलिस ठाण्यात तक्रार दाखल केली. या तक्रारीनंतर कार चालकाविरोधात गुन्हा दाखल करण्यात आला आहे. या घटनेनंतर कार चालकाविरोधात कठोर कारवाई करण्यात यावी अशी मागणी केली जात आहे.

पोलिसांनी दिलेल्या माहितीनुसार, आश्वत स्वामी यांचा मुलगा निष्कर्ष याला घेऊन सासू सरस्वती रेड्डी या सोमवारी दुपारी साडेतीनच्या सुमारास सोसायटीच्या आवारात आल्या होत्या. सोसायटीच्या आवारात निष्कर्ष खेळत होता. त्यावेळी त्याठिकाणावरून जाणाऱ्या कारने त्याला धडक दिली. अपघातात गंभीर जखमी झालेल्या निष्कर्षला तातडीने खासगी रुग्णालयात दाखल करण्यात आले. पण उपचारांपूर्वीच डॉक्टरांनी त्याला मृत घोषीत केले.