सचिन जाधव, पुणे

पुण्यातून मोठी बातमी समोर आली आहे. हडपसर ग्लार्डिंग सेंटरच्या आवारातील एका झाडाला सुरक्षारक्षकाने ओढणीच्या साह्याने फाशी घेऊन आत्महत्या केल्याचे उघडकीस आले आहे. याप्रकरणी काळेपडळ पोलीस ठाण्यामध्ये आकस्मित मृत्यूची नोंद करण्यात आली. ज्ञानेश्वर शिवाजी गाडेकर ( वय २९, रा.पापडे वस्ती, फुरसुंगी मूळ रा. किल्लारी लातूर ) असे फाशी घेतलेल्याचे व्यक्तीचे नाव आहे. या सुरक्षारक्षकाने का आत्महत्या केली हे अद्याप स्पष्ट झालेलं नाही. या प्रकरणी पोलीस पुढील तपास करत आहेत.

मिळलेल्या माहितीनुसार, ज्ञानेश्वर शिवाजी गाडेकर हे हडपसर मधील एका कंपनीमध्ये सुरक्षारक्षकाचे काम करतात. गुरुवारी ते नेहमी प्रमाणे डबा घेऊन कामाला जातो म्हणून बाहेर गेले होते, मात्र ते कामावर गेलेच नाही. तसेच ते घरी देखील परतले नाहीत. काल म्हणजेच शुक्रवारी हडपसर ग्लायडिंग सेंटरच्या परिसरात एका सुरक्षारक्षकाने गळफास घेतल्याचं नागरिकांना दृश्य दिसलं. नागरिकांनी तातडीने पोलीस ठाण्यात माहिती दिली. या माहितीच्या आधारे पोलिसांनी घटनास्थळी धाव घेतली.

घटनास्थळी पंचनामा करून पोलिसांनी तपास केला असता सुरक्षारक्षकाच्या खिशामध्ये काही वस्तू सापडल्या. या वस्तूंवरून त्याची ओळख पटवून पोलिसांनी त्याच्या नातेवाईकांशी संपर्क साधला. त्यानंतर ज्ञानेश्वर शिवाजी गाडेकर यांचा मृतदेह शवाविच्छेदनासाठी शासकीय रुग्णालयात पाठवण्यात आला. मात्र त्यांनी आत्महत्या का केली? याचे गूढ कायम आहे. पोलीस या घटनेचा सर्व अँगलने तपास करत आहेत. या घटनेने पुण्यात खळबळ उडाली आहे.