अक्षय बडवे, पुणे

Pune News: पुण्यामध्ये पाणी भरताना झालेल्या भांडणात एकाने पोटात लाथ मारल्याने महिलेचा गर्भपात झाल्याची धक्कादायक घटना समोर आली आहे. पुण्यातल्या वाघोलीमध्ये (Wagholi) ही घटना घडली आहे. याप्रकरणी २५ वर्षांच्या महिलेने लोणीकंद पोलीस ठाण्यात (Lonikand Police Station) तक्रार दाखल केली. या तक्रारीवरुन पोलिसांनी दोघांविरोधात गुन्हा दाखल केला आहे. या प्रकरणाचा तपास पोलिसांकडून सुरु आहे.

मिळालेल्या माहितीनुसार, १५ जुलै रोजी ही घटना घडली आहे. वाघोली येथे राहणारी २५ वर्षीय महिला घराजवळील सार्वजनिक नळावर पाणी भरत होती. त्याचवेळी या महिलेच्या शेजारी राहणाऱ्या रोहितने नळाखाली लावलेला हंडा बाजुला केला. त्यामुळे दोघांमध्ये शाब्दिक बाचाबाची झाली. या महिलेने "माझा नंबर आधी आहे, तू मला पाणी भरु दे. माझे झाल्यानंतर तू पाणी भर" असे सांगितले.

यावरुन रोहितने या महिलेला शिवीगाळ करायला सुरुवात केली. त्याचे वडिल रवी धोत्रे आणि आई शांताबाई धोत्रे हे देखील घटनास्थळी पोहचले. या दरम्यान रोहितने महिलेच्या कानाखाली मारली. तर रोहितच्या आई -वडिलांनी देखील महिलेला मारहाण केली. त्यानंतर रोहितने या महिलेच्या पोटावर लाथ मारली.

मारहाण केल्यामुळे गर्भवती महिला या नळाजवळ खाली पडल्या. त्यामुळे तिच्या पोटात दुखू लागले. घरी जाऊन झोपल्यानंतर महिलेच्या शरीरातून रक्तस्त्राव होऊ लागला. त्यामुळे या महिलेला ससून रुग्णालयात उपचारासाठी दाखल करण्यात आले. तर डॉक्टरांनी तिचा गर्भपात झाल्याचे सांगितले. या मारहाणीमुळे महिलेचे आई होण्याचे स्वप्न अपूर्ण राहिले.

त्यानंतर या महिलेने लोणीकंद पोलीस ठाण्यात धाव घेत रोहित आणि त्याची आई शांताबाई धोत्रेविरोधात तक्रार दाखल केली. पोलिसांनी या प्रकरणी दोघांविरोधात गुन्हा दाखल करत तपास सुरु केला आहे.