मुख्यमंत्री एकनाथ शिंदे यांच्या ताफ्याचा पाठलाग केल्याप्रकरणी मुंबई पोलिसांनी एका तरुणाला अटक केली आहे. शुभम कुमार (वय ३०) असं अटक करण्यात आलेल्या तरुणाचं नाव आहे. त्याच्यावर गुन्हा देखील दाखल करण्यात आला आहे. आपण अभिनेता असल्याचं या तरुणाने पोलिसांना सांगितलं आहे.

मिळालेल्या माहितीनुसार, मुख्यमंत्री एकनाथ शिंदे (CM Eknath Shinde) यांचा ताफा रविवारी रात्री साडेअकरा वाजेच्या सुमारास मुंबईकडून ठाण्याच्या दिशेने येत होता. वांद्रे वरळी सी लिंकवरून पोलीस वाहतुकीचे नियमन करत होते. मुख्यमंत्र्याच्या ताफ्यासाठी लेन ७ आणि ८ रिकामी करण्यात आली होती.

त्याचवेळी अचानक एक तरुणाने मुख्यमंत्र्यांच्या ताफ्याचा पाठलाग सुरू केला. त्याने सातव्या लेनवर कार घातली. पोलिसांनी (Mumbai Police) या तरुणाला इशारा देत गाडी थांबवण्यास सांगितले. मात्र, तरी देखील तरुण सुसाट वेगाने मुख्यमंत्र्यांच्या ताफ्याचा पाठलाग करत होता.

पोलिसांनी वेळीच सतर्कता दाखवत या तरुणाला थांबवलं. माझं नाव शुभम कुमार असून मी अभिनेता आहे, असं या तरुणाने पोलिसांना सांगितलं. मात्र, मुख्यमंत्र्यांच्या ताफ्याची सुरक्षा भेदण्याचा प्रयत्न केल्याप्रकरणी पोलिसांनी त्याला अटक केली. आरोपी शुभम याच्यावर गुन्हाही दाखल करण्यात आला आहे.