Sanjay Raut Bail : पत्राचाळ घोटाळा प्रकरणात न्यायालयीन कोठडीत असलेले शिवसेनेचे (Shivsena) खासदार संजय राऊत यांना कोर्टाने जामीन मंजूर केला आहे. ईडीने अटक केल्यानंतर १०१ दिवसांनी कोर्टानं त्यांना जामीन दिला आहे. राऊत यांना मुंबईच्या पीएमएलए न्यायालयाने जामीन मंजूर केला आहे. (Sanjay Raut Latest News)

सध्याच्या कसोटीच्या काळात संजय राऊत (Sanjay Raut) यांना जामीन मिळणे हा ठाकरे गटासाठी मोठा दिलासा मानला जात आहे. गेल्या १०० दिवसांपासून संजय राऊत पत्राचाळ घोटाळा प्रकरणात तुरुंगात होते. गेल्या अनेक दिवसांपासून त्यांच्याकडून जामिनासाठी प्रयत्न सुरु होते. मात्र, आतापर्यंत पीएमएलए कोर्टाने त्यांना दिलासा दिलेला नव्हता.

त्यामुळे आजच्या सुनावणीत काय होणार याकडे सर्वांचं लक्ष लागून होतं. ईडीने केलेले आरोप हे बिनबुडाचे असल्याचा दावा संजय राऊत यांच्याकडून करण्यात आला होता. अखेर आज कोर्टाने त्यांना आज जामीन मंजूर केला. दरम्यान, संजय राऊत यांना जामीन मिळताच, शिवसैनिकांनी कोर्टाचे आभार मानले आहे. (Sanjay Raut News Today)

काय आहे प्रकरण?

मुंबईतील गोरेगाव परिसरातील पत्राचाळ जमीन गैरव्यवहार प्रकरणात अंमलबजावणी संचालयाने (ईडी) संजय राऊत यांना 31 जुलै रोजी अटक केली होती. संजय राऊत आणि त्यांचे बंधू प्रविण राऊत हेच पत्राचाळ प्रकरणातील मास्टरमाइंड असल्याचा आरोप ईडीकडून करण्यात येत आहे. दुसरीकडे ईडीनं लावलेले आरोप बिनबुडाचे असल्याचा युक्तिवाद संजय राऊतांच्या वतीनं करण्यात आला होता.

दरम्यान 31 जुलैला अटक झाल्यापासून संजय राऊत हे कोठडीतच होते. सुरूवातीला ते ईडीच्या कोठडीत होते. मात्र, नंतर त्यांची रवानगी न्यायालयीन कोठडीत करण्यात आली. सध्या त्यांनी जामीनासाठी अर्ज केला आहे. या जामीन अर्जावर 2 नोव्हेंबर रोजी सुनावणी झाली. त्यावेळी न्यायालयाने निकाल राखून ठेवला होता. आज या निकालाचे न्यायालयाकडून वाचन करण्यात आलं. त्यात कोर्टाने राऊत यांना जामीन मंजूर केला आहे.

Edited By - Satish Daud