Panvel-Karjat Latest News : पनवेल कर्जत रेल्वे मार्ग वर्षाअखेर सुरू होणार आहे. पनवेल-कर्जत हा नवा उपनगरीय रेल्वेमार्ग या वर्षाअखेरीस सुरु होण्याची शक्यता आहे. या रेल्वे मार्गिकेचे 99 टक्के काम पूर्ण झालंय... पहिल्या टप्प्यात या मार्गावर दररोज ५० लोकल फेऱ्या चालवल्या जाणार आहेत. यामुळे नवी मुंबई आणि रायगड परिसरातील प्रवाशांचा प्रवास सोयीस्कर होणार आहे.

'मुंबई नागरी परिवहन प्रकल्प-३' (MUTP-3) अंतर्गत पनवेल-कर्जत नवीन दुहेरी उपनगरी रेल्वेमार्गाचे काम आता अंतिम टप्प्यात आले आहे. या प्रकल्पाचे जवळपास ९९ टक्के काम पूर्ण झाले असून चालू वर्षाच्या अखेरपर्यंत हा मार्ग प्रवाशांसाठी खुला केला जाणार आहे. या नवीन रेल्वेमार्ग सुरू झाल्यानंतर नवी मुंबई, पनवेल, चौक आणि कर्जत परिसरातील प्रवाशांना उपनगरी रेल्वेचा जलद पर्याय उपलब्ध होणार आहे. रस्ते प्रवासाच्या तुलनेत हा प्रवास अत्यंत स्वस्त आणि जलद ठरणार असून प्रवाशांचा बहुमोल वेळ वाचणार आहे.

कामांची सध्याची स्थिती

या मार्गावरील २ मोठे पूल, ३५ लहान पूल आणि ५ उड्डाणपुलांपैकी १५ उड्डाणपुलांचे काम ९९% पूर्ण झाले आहे. कर्जतमधील उड्डाणपूल पूर्ण झाला आहे.

६.७० किमी लांबीच्या ३ भुयारी मार्गांचे (बोगदे) खोदकाम आणि अस्तरकरणाचे काम पूर्ण झाले आहे. तसेच पनवेल, मोहोपे, चिखले, चौक या स्थानकांची कामे अंतिम टप्प्यात आहेत.

२९.६ किलोमीटर लांबीच्या या मार्गावर २९.७० किलोमीटर रुळांची जोडणी पूर्ण झाली आहे.

पहिल्या टप्प्यात दररोज ५० फेऱ्या

मध्य रेल्वेचे मुख्य जनसंपर्क अधिकारी डॉ. स्वप्नील निला यांनी दिलेल्या माहितीनुसार, पहिल्या टप्प्यात या मार्गावर रोज सुमारे ४० ते ५० लोकल फेऱ्या चालवण्याचे नियोजन आहे. प्रवाशांची वाढती मागणी आणि प्रतिसाद लक्षात घेऊन पुढील टप्प्यात वातानुकूलित (AC) लोकल फेऱ्या सुरू करण्याचा विचार केला जाईल. या प्रकल्पामुळे बदलापूर, अंबरनाथ मार्गावरील वाहतुकीचा ताण कमी होण्यास मोठी मदत होणार आहे. सुमारे २ हजार ८७२ कोटी रुपये खर्चाचा हा प्रकल्प पूर्ण झाल्यावर मुंबई आणि नवी मुंबईचा थेट संपर्क अधिक मजबूत होणार आहे.