- सागर आव्हाड

विद्युतविषक कामांसाठी पुणे शहराचा पाणी पूरवठा येत्या शुक्रवारी (ता. 24) बंद राहणार असल्याची माहिती पुणे महापालिका पाणी पूरवठा विभागाने कळवली आहे. नागरिकांनी पाण्याचा काटकसरीने वापर करावा असे आवाहन महापालिकेने केले आहे.

पुणे महापालिका पाणी पुरवठा विभागाचे प्रमुख नंदकिशोर जगताप यांनी दिलेल्या माहितीनूसार पाणी व्यवस्थापनाच्या देखभाल दुरुस्तीची कामे तसेच विद्युतविषयक कामे हाती घेतली जाणार आहेत. या कामांमुळे शुक्रवारी (ता. 24) संपूर्ण पुणे शहराचा पाणीपुरवठा बंद राहील तसेच शनिवारी (ता. 25) सकाळी उशिरा व कमी दाबाने पाणी पुरवठा सुरू होईल.

जगताप म्हणाले पर्वती एमएलआर टाकी, सर्व पेठा, पर्वती एचएलआर टाकी, पद्मावती, बिबवेवाडी, सॅलिसबरी पार्क, पर्वती एलएलआर टाकी, सिंहगड रस्ता आणि अंतर्गत समाविष्ट गावे, एसएनडीटी टाकी परिसरातील गोखलेनगर, शिवाजीनगर, वारजे जलकेंद्र अखत्यारीतील चांदणी चौक टाकी परिसर, बावधन, पाषाण, संपूर्ण कोथरूड, गांधीभवन टाकी परिसर, पॅनकार्ड क्लब जीएसार टाकी, वारजे जलकेंद्र जीएसआर टाकी परिसर, चतुःशृंगी टाकी परिसर, पाषाण पंपिंग व सूस गोल टाकी परिसर, लष्कर ते खराडी पंपिंग, लष्कर केंद्र, नवे व जुने होळकर जलकेंद्र, जागतिक पाणीपुरवठा योजना चिखली या भागांतील पाणीपुरवठा बंद राहणार आहे.

दरम्यान नागरिकांनी पाण्याचा काटकसरीने वापर करावा असे आवाहन पुणे महापालिका पाणी पुरवठा विभागाचे प्रमुख नंदकिशोर जगताप यांनी केले आहे.

Edited By : Siddharth Latkar