Pune traffic diversion routes for trucks : पुणे शहरात १० दिवस जड वाहनांना प्रवेश देण्यात येणार नाही. जिल्हाधिकाऱ्यांनी याबाबतचे आदेश जारी केले आहे. १५ जून ते २४ जून यादरम्यान दहा दिवस पुणे शहरात जड वाहनांना नो एंट्री असेल. अपघात रोखण्यासह जिल्हाधिकाऱ्यांनी हा निर्णय घेतल्याची माहिती प्रशासनाकडून मिळाली आहे.

जानेवारी २०२६ पासून आतापर्यंत पुण्यात जड वाहनाने ३० अपघातात झाले असून यामध्ये ३१ जणांचा मृत्यू झाल्याची नोंद आहे. या पार्श्वभूमीवर जड आणि अवजड वाहनांना पुढील दहा दिवस पुणे शहरात बंदी असणार आहे. अत्यावश्यक वाहने सोडून जड आणि अवजड वाहनाने पर्यायी मार्गाचा वापर करण्याचे आवाहन प्रशासनाकडून करण्यात आले आहे.

जड वाहनांसाठी पर्यायी मार्ग कोणते?

सोलापूरकडून मुंबईकडे जाणारी वाहने - केडगाव चौफुला - न्हावरे - शिक्रापूर - चाकण मार्गे किंवा उरळी कांचन - कोरेगाव मूळ - आष्टापूर - शिक्रापूर - चाकण मार्गे वळविण्यात येणार आहेत.

मुंबईकडून सोलापूरकडे जाणारी वाहने - तळेगाव दाभाडे - चाकण - शिक्रापूर - न्हावरे - केडगाव चौफुला मार्गे जातील. मुंबई ते अहिल्यानगर वाहतूक : तळेगाव - चाकण - खेड - मंचर - आळेफाटा मार्गे किंवा नाशिक फाटा - भोसरी - चाकण - शिक्रापूर मार्गे वळविण्यात येणार आहे.