सूरज मसुरकर, साम टीव्ही प्रतिनिधी

मुंबई : राज्याच्या राजकारणातून मोठी बातमी समोर आली आहे. भाजप खासदार नारायण राणे यांचं सुपुत्र माजी खासदार निलेश राणे हे लवकरच एकनाथ शिंदेंच्या शिवसेनेत प्रवेश करणार असल्याची माहिती समोर आली आहे. याच पार्श्वभूमीवर नारायण राणे आणि मुख्यमंत्री एकनाथ शिंदे यांच्या भेटीनंतर या राजकीय चर्चांना उधाण आलं आहे.

सूत्रांनी दिलेल्या माहितीनुसार, आगामी विधानसभा निवडणुकीसाठी महायुतीमधील घटक पक्षांनी जोरदार सुरुवात केली आहे. या निवडणुकीच्या पार्श्वभूमीवर खासदार नारायण राणे यांनी मुख्यमंत्री एकनाथ शिंदे यांची भेट घेतली. या भेटीत कुडाळ विधानसभा मतदारसंघावर राणे कुटुंबीयांनी दावा केला आहे. तर महायुतीतील जागावाटपात कुडाळ विधानसभा मतदारसंघ एकनाथ शिंदे यांच्या शिवसेनेच्या वाट्याला जाण्याची शक्यता आहे.

त्यामुळे निलेश राणे हे एकनाथ शिंदे यांच्या शिवसेनेत प्रवेश करून शिवसेनेकडून कुडाळ-मालवणचे उमेदवार असण्याची शक्यता आहे. आज नारायण राणे आणि मुख्यमंत्री यांच्यात झालेल्या बैठकीत निलेश राणेंच्या प्रवेशासंदर्भात चर्चा झाली. त्यावर पक्ष प्रवेशाचा हा तोडगा निघाल्याची माहिती खात्रीलायक सूत्रांनी दिली. निलेश राणे हे शिवसेनेत प्रवेश करणार असल्याच्या वृत्तानंतर राजकीय वर्तुळात चर्चांना उधाण आलं आहे.

माजी खासदार निलेश राणे हे कुडाळ मतदारसंघातून निवडणूक लढवण्यास इच्छुक आहे. यामुळे या मतदारसंघाबाबत नारायण राणेंनी मुख्यमंत्री एकनाथ शिंदे यांच्यासोबत चर्चा केल्याची माहिती मिळत आहे. राजकीय चर्चांनंतर आता निलेश राणे शिवसेनेत प्रवेश करणार का, याकडे सर्वांचं लक्ष लागलेलं आहे.

निलेश राणे यांच्या पक्ष प्रवेशाच्या चर्चेवर उदय सामंत यांची पहिली प्रतिक्रिया

निलेश राणे यांच्या शिवसेना पक्षप्रवेशाच्या चर्चेवर उदय सामंत म्हणाले, 'निलेश राणे हे कोकणातले लोकांमध्ये मिळून मिसळून काम करणारा एक चांगला युवा नेता आहे. - त्यांच्याबाबत आज नारायण राणे आणि मुख्यमंत्री शिंदे यांच्यात काय चर्चा झाली हे मला माहीत नाही. फक्त निलेश राणे विधानसभा निवडणुकीला उभे राहणार आहेत, इतकंच मला माहीत आहे. याबाबतीत मुख्यमंत्री जो निर्णय घेतील तो मला मान्य असेल.

'निलेश राणे यांनी निर्णय घेतल्यास महायुतीची संपूर्ण ताकद आपण त्यांच्या मागे उभी करू. पक्ष प्रवेशाचा निर्णय मुख्यमंत्री एकनाथ शिंदे , देवेंद्र फडणवीस आणि नारायण राणे यांनी घ्यायचा आहे. निलेश राणे यांनी निर्णय घेतला तर आमची कोकणातील शिवसेनेची ताकद पूर्णपणे त्यांच्या पाठीशी असेल,असेही ते म्हणाले.