पुण्यातून एक धक्कादायक बातमी समोर येत आहे. शिंदे गटाच्या शिवसेना युवासेनेचे पुणे जिल्हाप्रमुख निलेश राजेंद्र घारे यांच्या वाहनावर मध्यरात्री अज्ञात व्यक्तींनी गोळीबार केल्याची माहिती समोर आली आहे. ही घटना वारजे माळवडी परिसरात रविवारी रात्री १२ वाजण्याच्या सुमारास घडली असून, या घटनेनंतर परिसरात खळबळ उडाली आहे.

'त्या' रात्री नेमकं काय घडलं?

मिळालेल्या प्राथमिक माहितीनुसार, निलेश घारे हे गणपती माथा येथील जनसंपर्क कार्यालयात सहकाऱ्यांसह उपस्थित होते. त्याचवेळी, बाहेर पार्क केलेल्या काळ्या रंगाच्या गाडीवर दुचाकीवरून आलेल्या दोन अज्ञातांनी धाडधाड गोळी झाडली. नंतर तेथून पसार झाले.

घटनेची माहिती मिळताच पोलिसांनी घटनास्थळी धाव घेतली असून, फॉरेन्सिक तपास आणि सीसीटीव्ही फुटेजद्वारे तपास सुरू आहे. गोळी नेमकी कुणी आणि का झाडली? याचा शोध पोलिसांकडून सुरू आहे.

राजकीय वर्तुळात खळबळ

या हल्ल्यामुळे राजकीय वर्तुळात खळबळ उडाली असून, विविध पक्षांच्या नेत्यांनी या घटनेचा तीव्र निषेध व्यक्त केला आहे. पोलिस प्रशासनाने जलद कारवाईची मागणी करण्यात येत आहे.