Summary -

• मुंबई-गोवा महामार्गावर भीषण अपघात

• नवदाम्पत्य दुचाकीवरून गावाकडे जात होते

• दुचाकीला सिमेंट मिक्सर ट्रकने धडक दिली

• अपघातामध्ये नवऱ्याने बायकोच्या डोळ्यासमोर प्राण सोडले

मुंबई-गोवा महामार्गावर झालेल्या भीषण अपघातामध्ये नवविवाहित तरुणाचा जागीच मृत्यू झाला. ही घटना बुधवारी घडली होती. पनवेल येते राहणारा ३४ वर्षीय तरुण आपल्या बायकोला घेऊन गावाकडे जात होता. त्याचवेळी नागोठणेकडे जाणाऱ्या सिमेंट मिक्सर ट्रकने त्याच्या दुचाकीला धडक दिली. हा अपघात इतका भीषण होता की बायकोच्या डोळ्यासमोर नवऱ्याचा मृत्यू झाला. अपघातामध्ये गंभीर जखमी झालेल्या महिलेवर सध्या रुग्णालयात उपचार सुरू आहेत.

मिळालेल्या माहितीनुसार, अपघाताची ही घटना बुधवारी सकाळी पावणे दहा वाजताच्या सुमारास घडली होती. पनवेल येथे राहणाऱ्या महेश जाधवचे ८ दिवसांपूर्वी सुजातासोबत लग्न झाले होते. ते दोघे पनवेल येथे राहत होते. लग्नानंतर ते दुचाकीने माणगाव तालुक्यातील पन्हाळघर गावामध्ये जात होते त्यावेळी वाटेमध्ये हा भयंकर अपघात झाला. नागोठणे येथील सिमेंट प्लांटकडे जाणाऱ्या सिमेंट मिक्सर ट्रकने त्यांच्या दुचाकीला जोरदार धडक दिली. ही धडक इतकी जोरदार होती की दुचाकी पुलावर २० मीटरपर्यंत घसरत गेली.

या अपघातामध्ये महेश आणि सुजाता दोघेजण गंभीर जखमी झाले होते. जखमी झालेल्या महेशने जागीच प्राण सोडले. सुजाताच्या डोळ्यासमोरच नवऱ्याचा मृत्यू झाला. महेश पनवेलमध्ये राहत होता आणि तो टेम्पो चालक म्हणून काम करत होता. या अपघातानंतर वडखळ पोलिसांनी आरोपी चालक दिलचंद कुमार चौहान (२३ वर्षे) याच्याविरोधात गुन्हा दाखल केला.

तर अपघातामध्ये गंभीर जखमी झालेल्या सुजातावर एका खासगी रुग्णालयात उपचार करण्यात आले त्यानंतर तिला घरी सोडण्यात आले. या घटनेमुळे पन्हाळघर गावावर दु:खाचा डोंगर कोसळला. सुखी संसार सुरू होण्यापूर्वीच महेशचा अपघाती मृत्यू झाल्यामुळे हळहळ व्यक्त केली जात आहे.