सचिन जाधव, साम टीव्ही

पुण्यात खराडी परिसरातील मुळा-मुठा नदीपात्रात शुक्रवारी दुपारी एका नवजात चिमुकलीचा मृतदेह आढळून आल्याची संतापजनक आणि हृदयद्रावक घटना समोर आली आहे. जन्मानंतर लगेचच अज्ञात व्यक्तीने या बाळाला नदीत फेकून दिल्याची प्राथमिक शक्यता वर्तवण्यात येत असून, पोलीस या प्रकरणाचा गांभीर्याने तपास करत आहेत.

मिळालेल्या माहितीनुसार, शुक्रवारी दुपारी खराडीजवळील नदीपात्रात एक नवजात बाळ तरंगताना काही नागरिकांना दिसले. घटनेची माहिती मिळताच वाघोली पोलिसांनी तातडीने घटनास्थळी धाव घेत परिसराची पाहणी केली. नदीत मृतदेह असल्याचे स्पष्ट झाल्यानंतर 'शहीद भगतसिंग जीवन रक्षक फाउंडेशन'चे जीवरक्षक बच्चूसिंग टाक यांनी बोटीच्या साहाय्याने नदीत उतरून या बाळाचा मृतदेह बाहेर काढला. प्राथमिक तपासात हे मृत अर्भक स्त्री जातीचे असल्याचे समोर आले आहे. पोलिसांनी घटनास्थळाचा पंचनामा करून मृतदेह पुढील वैद्यकीय तपासणी व शवविच्छेदनासाठी शासकीय रुग्णालयात रवाना केला आहे.

या चिमुकलीला नदीत कोणी फेकले आणि त्यामागे कोणाचा हात आहे, याचा शोध घेण्यासाठी वाघोली पोलीस परिसरातील सीसीटीव्ही (CCTV) फुटेज तपासत असून, स्थानिक पातळीवर तसेच रुग्णालयांमध्ये गुप्त माहिती गोळा करण्याचे काम सुरू आहे. या अमानुष कृत्यामुळे परिसरातून तीव्र संताप व्यक्त केला जात आहे.