Expressway News : एमएमआरडीएने नवीन एक्स्प्रेस वेसाठी मार्गाचे नियोजन सुरु करण्यात आले आहे. या नव्या महामार्गामुळे मुंबई, नवी मुंबई परिसरात वाहतूक अधिक सुरळीतपणे होईल असा विश्वास एमएमआरडीएला आहे. तब्बल ६,००० चौरस किमी क्षेत्रफळावर या प्रकल्पाचे काम सुरु केले जाणार आहे. हा महत्त्वाकांक्षी प्रकल्प १२ मेट्रो मार्ग, दोन सागरी पूल, तीन महामार्गांना जोडला जाणार असल्याची माहिती समोर आली आहे.

डोबिंवली, कल्याण, बदलापूर अशा ठिकाणी राहणाऱ्या नागरिकांना मुंबई, नवी मुंबईला बाय-रोड जाण्यासाठी कष्ट घ्यावे लागतात. या नव्या एक्स्प्रेस वेमुळे नागरिकांना मुंबई आणि नवी मुंबईला जाण्यासाठी थेट मार्ग उपलब्ध होईल. एमएमआरडीएने हा महामार्ग प्रवाशांचा त्रास कमी व्हावा या उद्देशाने तयार करण्याचा निर्णय घेतला आहे.

मुंबई महानगर प्रदेश विकास प्राधिकरणाने या नव्या एक्स्प्रेस वेससाठी निविदा मागवल्या आहेत. नियुक्त केलेल्या कंत्राटदारांवर महामार्गासाठी सर्वेक्षण करुन भूसंपादन करणे, त्यानंतर संपूर्ण बांधकाम करणे अशी जबाबदारी असेल. कंत्राट दिल्यानंतर सात ते आठ महिन्यांच्या आत प्रकल्प पूर्ण करणे आवश्यक असल्याचे एमएमआरडीच्या अहवालामध्ये म्हटले आहे.

नवीन एक्स्प्रेस वे हा राष्ट्रीय द्रुतगती महामार्गाच्या मानकांनुसार तयार केला जाणार असे म्हटले जात आहे. डीपीआर (तपशीलवार प्रकल्प अहवाल) तयार करणारा कंत्राटदार या नव्या महामार्गाची अंतिम रुंदी निश्चित करेल असेही एमएमआरडीएने म्हटले आहे. येत्या काही महिन्यात हा प्रकल्प सुरु होईल असा अंदाज वर्तवला जात आहे.