सागर आव्हाड, साम टीव्ही

पुणे: खडकवासला परिसरातील कालव्यात पोहायला गेलेल्या एनडीएतील हवाई दलाच्या कर्मचाऱ्याचा दुर्दैवी मृत्यू झाल्याची घटना समोर आली आहे. राजेशकुमार वर्मा (वय 41) असे मृत्यू झालेल्या जवानचे नाव आहे. वर्मा हे राष्ट्रीय संरक्षण प्रबोधिनी (NDA) येथे नियुक्तीवर होते. पोलिसांनी दिलेल्या माहितीनुसार, रविवारी वर्मा हे आपल्या सहकाऱ्यांसोबत खडकवासला येथील कालव्यात पोहण्यासाठी गेले होते. यावेळी पाण्याच्या खोलीचा अंदाज न आल्याने त्यांचा तोल गेला आणि ते वाहत्या पाण्यात बुडाले, घटनेची माहिती मिळताच सहकाऱ्यानी तात्काळ पोलिसांना कळवले.

यानंतर एनडीएचे पथक, अग्निशमन दल आणि इतर यंत्रणांनी घटनास्थळी धाव घेत व्यापक शोधमोहीम सुरू केली. रविवारी सायंकाळपर्यंत शोध सुरू होता, मात्र अंधार पडल्याने मोहीम थांबवावी लागली. सोमवारी दुपारी सुमारे चार वाजता सिंहगड रस्त्यावरील नांदेड फाटा परिसरातील कालव्यात वर्मा यांचा मृतदेह आढळून आला. घटणस्थळापासून सुमारे 700 मीटर अंतरावर कालव्यात पडलेल्या काटेरी झाडात त्यांचा मृतदेह अडकलेला होता, पाण्याच्या हालचालीमुळे तो वर आल्याचे समजते.

मुळशी तहसीलदार विजयकुमार चोभे यांच्या मार्गदर्शनाखाली आपत्ती व्यवस्थापन पथक, पीएमआरडीएचे जवान आणि स्कुबा डायव्हर्स यांनी संयुक्तरीत्या मृतदेह बाहेर काढला. त्यानंतर वर्मा यांचा मृतदेह एनडीएच्या जवानांकडे सन्मानपूर्वक सुपूर्द करण्यात आला. या प्रकरणी नांदेड सिटी पोलीस ठाण्यात अकस्मात मृत्यूची नोंद करण्यात आली असून पुढील तपास सुरू आहे.