नसरापूरमध्ये बालिकेवर झालेल्या अत्याचाराने महाराष्ट्र सून्न झालाय. सर्व स्तरावर तीव्र प्रतिक्रीया उमटत असतानाच शवविच्छेदन अहवालातून धक्कादायक माहिती समोर आली आहे. ससूनमधील न्यायवैद्यक विभागात शवविच्छेदनाची संपूर्ण प्रक्रिया ‘इन कॅमेरा’ करण्यात आली होती. शवविच्छेदनाचा प्राथमिक अहवाल पोलिसांना देण्यात आला आहे. त्यातून नराधमाने क्रौर्याची परिसीमा गाठल्याचे स्पष्ट झालंय.

नसरापूरमध्ये क्रौर्याची परिसीमा

आरोपीने लैंगिक अत्याचार करून खून करताना मुलीच्या तोंडात पायमोजा कोंबला होता. त्यामुळे ऍस्फिक्सिया म्हणजे श्वास कोंडून बालिकेचा मृत्यू झाला, असं प्राथमिक अहवालात नमूद करण्यात आलंय. तसेच अंगावर जखमा असल्याची माहिती सूत्रांनी दिली. दरम्यान प्रादेशिक न्यायसहायक वैज्ञानिक प्रयोगशाळेतील तपासणीतूनच मृत्यूचे खरे कारण स्पष्ट होणार आहे.

ससून रुग्णालयात ६५ वर्षांच्या आरोपीची लैंगिक सक्षमता तपासणीही करण्यात आली आहे. दुसरीकडे चिमुरडीच्या आई-वडीलांचा आक्रोश मन सुन्न करत आहे. दोन दिवसांपासून त्यांनी अन्न ग्रहण केले नसल्याची माहिती समोर आली आहे. ‘तिला गाय आणि वासरू खूप आवडायचे. दोन दिवसांपूर्वीच एका गायीला वासरू झाले होते. ते पाहण्यासाठीच ती गोठ्याकडे गेली’ अशा शब्दांत वडिलांनी आपल्या लेकीच्या आठवणी सांगताना हळहळ व्यक्त केली. तर आई सतत चिमुरडीचा फ्रॉक हातात धरून रडत आहे. ‘सीसीटीव्ही’ फूटेजसह विविध तांत्रिक पुरावे जप्त करण्यात आले आहेत. नराधमाला फाशीची शिक्षा कधी होणार ? याकडे पीडित कुटुंबासह संपूर्ण राज्याचं लक्ष आहे