नायगावमधून मामा भाचीच्या नात्याला काळीमा फासणारी घटना समोर आली आहे. सोळा वर्षीय भाचीचा मामाने जीव घेतला आहे. धावत्या लोकलमधून त्यानं भाचीला ढकललं. या घटनेत तिचा दुर्देवी मृत्यू झाला. इतर प्रवाशांनी आरोपीला त्याचक्षणी पकडलं. तसेच पोलिसांच्या स्वाधीन केलं. सध्या आरोपी पोलिसांच्या ताब्यात असून, पुढील तपास पोलिसांकडून सुरू आहे.

ही धक्कादायक घटना नायगाव भाईंदरच्या रेल्वे स्टेशनदरम्यान उघडकीस आली. १५ नोव्हेंबरपासून अल्पवयीन मुलगी बेपत्ता होती. तिच्या पालकांकडून अल्पवयीन मुलीचा शोध घेतला जात होता. १७ नोव्हेंबर रोजी अल्पवयीन मुलीचा मृतदेह सापडला. मिळालेल्या माहितीनुसार, अर्जुन सोनी असे आरोपीचे नाव आहे.

रेल्वे पोलिसांच्या तपासात महत्वपूर्ण माहिती समोर आली आहे. आरोपी मामा (वय वर्ष २०) हा अल्पवयीन मुलीसोबत चर्चगेट विरार लोकलच्या फर्स्ट क्लास डब्यात प्रवास करत होता. नायगावजवळ दोघेही दरवाज्याजवळ उभे असताना आरोपीनं अल्पवयीन मुलीला मागून ढकललं. धावत्या लोकलमधून पडल्याने दोघांचा जागीच मृत्यू झाला.

या संपूर्ण घटनेचे प्रत्यक्षदर्शी असलेले प्रवासी विक्रम नंदू झा यांनी संपूर्ण घटना पाहून इतर प्रवाशांच्या मदतीने आरोपीला पकडले. तसेच पोलिसांच्या ताब्यात दिलं. सध्या आरोपीला वलिव पोलिसांनी अटक केली असून, या घटनेचा पुढील तपास सुरू आहे. मामानं सख्ख्या भाचीला लोकलमधून खाली का ढकललं? याचाही शोध पोलिसांकडून सुरू आहे.