मुंबईकरांसाठी दिलासादायक बातमी आहे. शहराला पाणीपुरवठा करणारे सात प्रमुख तलाव भरली आहेत. पुढील ३४५ दिवस पुरेल इतका पाणीसाठा सध्या उपलब्ध असून मोडक सागर या धरणामध्ये पाणीसाठा १३ टक्क्यांनी घटला आहे. आज या सातही तलावांमध्ये एकूण १४,१९९७४ ML इतका पाणीसाठा जमा झाला आहे. मुंबई महापालिकेच्या माहितीनुसार, हा साठा एकूण ९८.११ टक्के इतका आहे.

यंदाचा पाणीसाठा किंचित कमी

गेल्या वर्षीच्या तुलनेत या कालावधीच्या तुलनेत यंदाचा पाणीसाठा किंचित कमी आहे. २०२५ मध्ये २२ सप्टेंबरच्या आसपास तलावांमध्ये ९९.२९ टक्के पाणीसाठा होता. तर २०२४ मध्ये याच काळात ९८.१५ टक्के साठा नोंदवण्यात आला होता. यंदा राज्यात एल निनोच्या महाभयंकर प्रभावामुळे पावसाला उशिराने सुरुवात झाली, तर तापमानात वाढ झाल्याने उकाडा वाढला. परिणामी पाऊस कमी पडल्याने पाण्याच्या पातळीत काहीशी घट झाल्याचे जाणवत आहे. मुंबईला पाणीपुरवठा करणाऱ्या ७ तलावांपैकी भातसा, विहार आणि तुळशी तलाव १०० टक्के भरलेले आहेत. विहार आणि तुळशी तलावातून अद्यापही पाण्याचा विसर्ग सुरू आहे. दुसरीकडे, मोडक सागरमध्ये सर्वात कमी म्हणजे ८८.८० टक्के पाणीसाठा आहे.

कोणत्या तलावात किती पाणीसाठा?

भातसा तलावाची स्थिती पाहता, तलावाची पाणीपातळी १४२.०७ मीटर असून त्यात ७,१७,०३७ ML पाणीसाठा आहे. गेल्या २४ तासांत येथे २ मिमी पावसाची नोंद झाली असून, यंदाच्या हंगामातील एकूण पाऊस २,६८९ मिमी झाला आहे. विहार तलाव १०० टक्के भरलेला असून त्याची पाणीपातळी ८०.२२ मीटर आहे. गेल्या २४ तासांत १२ मिमी पाऊस झाला आहे. या तलावातून ७ जुलैपासून पाण्याचा ओव्हरफ्लो सुरू आहे. तुळशी तलावाची पाणीपातळी १३९.२३ मीटर असून येथे ६१ मिमी पावसाची नोंद झाली. तुळशी तलावही ७ जुलैपासून ओसंडून वाहत आहे.

मोडक सागरच्या पाणीसाठ्यात घट

मोडक सागरमध्ये १,१४,४८२ ML पाणीसाठा असून तो ८८.८० टक्के आहे. गेल्या २४ तासांत तलावाची पाणीपातळी ०.३१ मीटरने वाढली. दरम्यान, अप्पर वैतरणामध्ये ९६.१८ टक्के, तर वैतरणामध्ये ९८.९६ टक्के पाणीसाठा आहे. तानसा तलावात ९८.४५ टक्के साठा असून तिन्ही तलावांमध्ये मिळून ६,६७,१९३ ML पाणी उपलब्ध आहे. एकूणच, मुंबईच्या सातही तलावांमध्ये ९८ टक्क्यांहून अधिक पाणीसाठा असल्याने शहराच्या पाणीपुरवठ्याच्या दृष्टीने सध्याची स्थिती समाधानकारक आहे.