मुंबई : मुंबईतील वाहतूक कोंडी कमी करण्यासाठी महत्वपूर्ण निर्णय घेण्यात आला आहे. राज्य सरकारने सायन-पनवेल महामार्गावर सायन ब्रिजच्या विस्ताराला मंजुरी दिली आहे. या निर्णयामुळे मुंबई उपनगरातील वाहतूक कोंडी कमी होण्यास मदत होणार आहे. ट्रॅफिक पोलीस विभागाकडून या प्रस्तावाला तत्त्वतः मंजुरी दिली आहे. तर महापालिकेच्या संबंधित विभागाने एनओसी देखील दिली आहे.

मीडिया रिपोर्टनुसार, पूलाच्या विस्तारानंतर दोन समांतर लेन बांधण्यात येईल. या प्रकल्पासाठी पुढील प्रक्रिया सुरु करण्यात आली आहे. या निर्णयाने मुंबईकरांना मोठा दिलासा मिळणार आहे.

सायन-पनवेल महामार्ग हा उपनगरातील महत्वाचा मार्ग आहे. या महामार्गावर दिवसाला लाखो वाहनांची रेलचेल असते. सध्या या महामार्गावर मोठ्या प्रमाणात वाहतूक कोंडी पाहायला मिळते. यामुळे सायन ब्रिजचा विस्तार करण्यात यावा, याची मागणी केली जात होती. या ब्रिजचं बांधकाम २००२ साली करण्यात आलं होतं. तेव्हापासून या महामार्गावर लाखो वाहनांची रेलचेल असते.

आता सायन ब्रिजवर तीन लेन आहेत. यातील दोन लेनचा ठाणे आणि ईस्टर्न एक्स्प्रेस महामार्गावर जाण्यासाठी उपयोग केला जातो. तर एका लेनचा उपयोग हा दक्षिण मुंबईला जाण्यासाठी केला जातो . मागील वर्षांपासून या महामार्गावर वाहनांची संख्या वाढू लागली आहे. त्यामुळे वाहतूक कोंडी मोठ्या प्रमाणात होते.

माजी खासदार राहुल शेवाळे यांनी या कामासाठी पाठपुरावा केला होता. त्यांनी डिसेंबर महिन्यात २०२३ साली मुंबई महापालिका आयुक्त इक्बाल सिंह चहल यांना पत्र लिहिलं होतं. त्यावेळी पत्र लिहून सायन ब्रिजच्या विस्तार करण्याची मागणी केली होती. आता या प्रकल्पाला वेग आला आहे.