डोंबिवली: राज्यातील सत्तासंघर्षात मुख्यमंत्री एकनाथ शिंदे (Eknath Shinde) यांनी बाजी मारली अन् मुख्यमंत्री पदाची शपथ घेतली. केवळ राज्याच्या कारभाराची सुत्र आपल्या हाती आली म्हणून शिंदे गप्प बसले नाहीत. तर त्यांनी ठाकरेंच्या शिवसेनेवरच आपला दावा करायला सुरुवात केली होती ती प्रत्यक्षात आमलात देखील आणली.

शिंदे यांनी आपलीचं शिवसेना (Shivsena) खरी असल्याचा दावा करत त्यासाठी पक्षांचे उपनेते, प्रवक्ते यांच्या नियुक्ता केल्या. शिवाय आता तर शिंदे गटाकडून प्रतिशिवसेना भवन देखील उभारण्यात येणार आहे.

त्यामुळे शिंदे विरुद्ध ठाकरे असा शिवसेनेसाठी संघर्ष सुरु असतानाच आता मुख्यमंत्री एकनाथ शिंदे यांचे सुपुत्र आणि कल्याण लोकसभेचे खासदार डॉ. श्रीकांत शिंदे (Shrikant Shinde) यांची युवासेनेच्या अध्यक्षपदी वर्णी लागणार अशी चर्चा रंगू लागली आहे. कारण याबाबतचे फोटो सोशल माध्यमातून खा.शिंदे यांचे कार्यकर्ते व्हायरल करू लागले आहेत.

पाहा व्हिडीओ -

मुख्यमंत्री एकनाथ शिंदे हे आता राज्यभर दौरे करत आहेत, तर त्यांचे पुत्र श्रीकांत शिंदे हे राज्यभरात दौरे करत आहेत.त्यामुळे खासदार शिंदे यांच्या खांद्यावर शिंदे गटाने युवा सेना अध्यक्ष पदाची धुरा द्यावी असे शिंदे समर्थकांचे खासगीत म्हणणे आहे.

त्यामुळे कार्यकर्ते फोटो आणि पोस्टर व्हायरल (Viral Photo) करत आहेत. त्यामुळे शिवसेना प्रवक्ते, नेते यांच्या नियुक्त्या केल्यानंतर मुख्यमंत्री शिंदे हे आपले पुत्र श्रीकांत शिंदे यांच्या खांद्यावर युवा सेना अध्यक्ष पदाची धुरा देणार का? हे पाहणं देखील महत्वाचं ठरणार आहे.

दरम्यान, बुलढाण्याचे शिवसेना खासदार प्रतापराव जाधव (Prataprao Jadhav) यांनी देखील मागे श्रीकांत यांनी युवासेनेचे अध्यक्ष बनवावं अशी मागणी केली होती. 'आपल्याला युवा सेनेचं काम वाढवायचं आहे. त्यासाठी श्रींकात शिंदे यांना लवकरात लवकर युवा सेनेची जबाबदारी द्यावी, एवढी माझी मागणी आहे, असं वक्तव्य त्यांनी केलं होतं. त्यामुळे आता शिंदेंच्या शिवसेनेचा युवासेना अध्यक्ष कोण होणार याकडे सर्वांच लक्ष लागून राहिलं आहे.

Edited By - Jagdish Patil