Palghar Accident News : पालघरमधील शिरसाड-वज्रेश्वरी मार्गावर झालेल्या भयंकर अपघातात ज्येष्ठ शिवसैनिक रवींद्र गोपाळ पाटील यांचा जागीच मृत्यू झाला. शिरसाड नाक्याजवळ हायवा ट्रकखाली चिरडून ५७ वर्षीय रवींद्र पाटील यांचा मृत्यू झाला. रवींद्र पाटील हे पालघरमधील वीटभट्टी व्यावसायिक आणि शिवसैनिक होते. शुक्रवारी सकाळी साडेअकराच्या सुमारास अपघात झाल्याची नोंद पोलिसांनी केली. या धक्कादायक घटनेमुळे संपूर्ण वसई आणि पारोळ परिसरात तीव्र संताप आणि शोककळा पसरली आहे.

अपघाताची माहिती मिळताच मांडवी पोलिसांनी तातडीने अपघातस्थळी धाव घेतली. पोलिसांनी तात्काळ पंचनामा करून वाहतूक सुरळीत केली. पोलिसांनी पाटील यांचा मृतदेह पोस्टमार्टमसाठी सरकारी रुग्णालयात पाठवला. पोलिसांनी घटनास्थळावरून आरोपी ट्रक चालकाला ताब्यात घेतले आहे. त्याच्यावर निष्काळजीपणे वाहन चालवून मृत्यूस कारणीभूत ठरल्याप्रकरणी गुन्हा दाखल केला आहे. पोलिसांकडून या प्रकरणात पुढील तपास करण्यात येत आहे.

५७ वर्षांचे रवींद्र पाटील हे पालघरमधील पारोळ येथील रहिवासी असून वीटभट्टी व्यावसायिक होते. पोलिसांनी दिलेल्या माहितीनुसार, रवींद्र पाटील चांदीप येथील बँकेतून दुचाकीने शिरसाडच्या दिशेने जात होते. शिरसाड नाक्याजवळ पोहोचल्यानंतर मागून येणाऱ्या एका हायवा ट्रकने अचानक डाव्या बाजूला गाडी वळवली. ट्रक चालकाच्या या निष्काळजीपणामुळे पाटील यांची दुचाकी थेट ट्रकच्या मागच्या चाकाखाली आल्याने अपघात घडला. हा अपघात इतका भीषण होता की पाटील यांना गंभीर दुखापत झाल्याने त्यांचा जागीच मृत्यू झाला.

हायवा ट्रक आणि दुचाकीचा अपघात इतका भयंकर होता की रवींद्र पाटील यांचा घटनास्थळीच मृत्यू झाला. अपघातानंतर स्थानिकांकडून तीव्र निषेध व्यक्त करण्यात आला आहे. पालघरमधील वाहतूक व्यवस्थेबाबत स्थानिक ग्रामस्थ आणि शिवसैनिकांकडून प्रचंड संताप व्यक्त करण्यात आला. रात्रंदिवस या मार्गावरून क्षमतेपेक्षा जास्त रेती आणि खडी वाहून नेणाऱ्या हायवा गाड्यांवर उपप्रादेशिक परिवहन कार्यालय (RTO) आणि पोलिसांनी कोणतीही कडक कारवाई केली नाही, असा आरोप नागरिकांनी केला आहे.