मुंबईतील पवई परिसरातील इंडियन इन्स्टिट्यूट ऑफ टेक्नॉलॉजी (IIT) कॅम्पसमधील हॉस्टेल क्रमांक ६ मध्ये गॅस गळतीमुळे अचानक भडका उडाल्याची घटना घडली. या दुर्घटनेत पाच जण जखमी झाले असून, त्यामध्ये दोन लहान मुलांचा समावेश आहे. घटनेनंतर परिसरात एकच खळबळ उडाली. जखमींना तातडीने उपचारासाठी रुग्णालयात दाखल करण्यात आले असून, सर्वांची प्रकृती स्थिर असल्याची माहिती आहे.

गॅस सिलिंडरच्या पाइपमधून गळती

मिळालेल्या माहितीनुसार, पवई येथील IIT कॅम्पसमधील हॉस्टेल क्रमांक ६ मध्ये गॅस सिलिंडरच्या पाइपमधून गॅसची गळती झाली. त्यानंतर अचानक फ्लेअर-अप म्हणजेच आगीचा भडका उडाला. या घटनेत जवळ असलेल्या पाच जणांना दुखापत झाली. घटनेचे नेमके कारण आणि गॅस गळती कशामुळे झाली, याबाबत अधिक तपास केला जात आहे.

जखमींमध्ये दोन लहान मुलांचा समावेश

या दुर्घटनेत अंश अहिरवार (१२), तहजीब आलम (९), ईश्वर सिंह (३७), शिवकुमार सिंह (३४) आणि अनिलकुमार यादव (२३) हे पाच जण जखमी झाले आहेत. जखमींमध्ये १२ आणि ९ वर्षांच्या दोन मुलांचा समावेश असल्याने या घटनेबाबत चिंता व्यक्त केली जात आहे. घटनेनंतर सर्व जखमींना सुरुवातीला राजावाडी रुग्णालयात उपचारासाठी दाखल करण्यात आले. त्यानंतर पाचपैकी चार जखमींना पुढील उपचारांसाठी कस्तुरबा रुग्णालयात हलवण्यात आले, तर एका जखमीवर राजावाडी रुग्णालयातच उपचार सुरू आहेत. सर्व जखमींची प्रकृती सध्या स्थिर असल्याचे सांगण्यात आले आहे.

पोलीस आणि अग्निशमन दल घटनास्थळी दाखल

गॅस गळतीमुळे भडका उडाल्याची माहिती मिळताच पोलीस आणि अग्निशमन दलाचे जवान तातडीने घटनास्थळी दाखल झाले. तसेच मुंबई महानगरपालिकेच्या (BMC) वॉर्ड कार्यालयातील कर्मचाऱ्यांनीही घटनास्थळी धाव घेतली. संबंधित यंत्रणांकडून परिस्थितीची पाहणी करण्यात आली. या घटनेनंतर गॅस सिलिंडर आणि त्याच्या पाइपची सुरक्षितता हा मुद्दा पुन्हा चर्चेत आला आहे.