संजय गडदे, मुंबई

मुंबईत एका हॉटेलमध्ये डेटिंग ॲपचा गैरवापर करत, तरुणांना प्रेमाच्या जाळ्यात ओढून पैसे उकळण्यात आल्याचा संतापजनक प्रकार समोर आला आहे. मुंबई पोलिसांच्या तत्परतेने या प्रकरणातील साकीनाका-पवई जवळील एका हॉटेलमधील मोठं रॅकेट उध्वस्त करण्यात आलं आहे. याप्रकरणी पोलीस अधिक तपास करत आहेत.

मिळालेल्या माहितीनुसार, दिल्लीतून २५ ते ३० तरुणी मुंबईत आणल्या गेल्या होत्या. या तरुणी डेटिंग अॅपच्या माध्यमातून तरुणांना जाळ्यात ओढायच्या. या तरुणी अॅपवरून चॅटिंग करून तरुणांना भेटायला बोलवायच्या. साकीनाका येथील क्लब कॅफेत हा सर्व प्रकार सुरू होता. धक्कादायक बाब म्हणजे कॅफेचा मालकही या रॅकेटमध्ये सक्रिय होता.

तरुणाला कॅफेत आणल्यानंतर मुली त्यांना धमकी द्यायच्या. त्यांना लैंगिक अत्याचाराची तक्रार करण्याची भीती दाखवली जात होती. तर अनेकदा मुली ऑर्डर करत त्याचे अव्वाच्या सव्वा बिल व्हायचे. अनेकदा हे बिल २५ ते ५० हजारांहून अधिक व्हायचं. याप्रकरणाची माहिती मिळताच पोलिसांनी सदर कॅफेवर धाड टाकली.

छापा टाकला तेव्हा एका पीडित तरुणाला बाऊंसर्सकडून धाक दाखवत पैसे वसुली सुरू होती. याप्रकरणी साकीनाका पोलिस ठाण्यात गुन्हा दाखल करण्यात आला असून सर्व आरोपी पोलिसांच्या ताब्यात आहेत. याशिवाय पोलिसांनी हा कॅफे सील केला आहे. सध्या ३ मुलींना अटक करण्यात आली असून त्यांना खास या रॅकेटसाठी दिल्लीहून आणण्यात आल्याची माहिती आहे. याप्रकरणी पोलीस अधिक तपास करत आहेत.