Drone & Flying Lantern Ban In Mumbai : दिवाळीचा सण अवघ्या दोन आठवड्यांवर आला आहे. या निमित्ताने मुंबई पोलीस आयुक्तालयाने सार्वजनिक सुरक्षा सुनिश्चित करण्यासाठी शहरात ड्रोन आणि आकाश कंदील उडवण्यात बंदी लागू केली आहे. उत्सवादरम्यान ड्रोन, आकाश कंदील यांच्या वापराशी संबंधित संभाव्य धोके टाळण्यासाठी सक्रीय उपाययोजना प्रशासनाकडून केल्या जात आहेत. याशिवाय पोलीस आयुक्तालयाने शहरात उडत्या कंदीलांची विक्री, साठवणूक आणि वापर यावरही ३० दिवसांची बंदी घातली आहे.

हवेतील उपकरणांमुळे अपघात होऊ शकतात. आग लागू शकते. या उपकरणांचा वापर करुन काही समाजकंटक व्हीव्हीआयपी लोकांना धोका पोहोचवू शकतात. सार्वजनिक व्यवस्था बिघडू शकते असे म्हणत मुंबई पोलीस आयुक्तालयाने ड्रोन आणि हवाई कंदील यांच्यावर बंदी लादण्याचा निर्णय घेतल्याचे म्हटले जात आहे.

ही दोन दोन टप्प्यांमध्ये लागू केली जाईल. ७ ऑक्टोबरपासून ते ५ नोव्हेंबरपर्यंत ड्रोन, रिमोट-कंट्रोल मायक्रो लाईट एअरक्राफ्ट, पॅराग्लायडर, पॅरामोटर, हँड ग्लायडर आणि हॉट एअर बलून उडवण्यावर पूर्ण बंदी राहील. त्यानंतर १२ ऑक्टोबर ते १० नोव्हेंबर या ३० दिवसांत हवेत उडणारे कंदील वापरणे, त्यांचा साठा करणे किंवा त्यांची विक्री करणे यावर बंदी आहे.

मुंबई पोलिसांनी इशारा दिला आहे की या नियमांचे उल्लंघन करणाऱ्यांविरुद्ध भारतीय दंड संहितेच्या कलम २२३ अंतर्गत कठोर कारवाई केली जाईल. नागरिकांना धोकादायक पद्धतींपेक्षा सुरक्षित आणि शांततापूर्ण उत्सव साजरा करण्यास प्राधान्य देऊन या नियमांचे काटेकोरपणे पालन करण्याचे आवाहन प्रशासन करत आहे.