संजय गडदे, मुंबई

मुंबईतून मोठी बातमी समोर आली आहे. एअर इंडियामध्ये नोकरी मिळवून देण्याची स्वप्न दाखवत बेरोजगार तरुणांची लाखो रुपयांची फसवणूक करण्यात आल्याची घटना घडली. याप्रकरणी तातडीने कारवाई करत मानखुर्द पोलिसांनी बनावट कॉल सेंटरचा पर्दाफाश केला आहे. या प्रकरणी उत्तराखंडमधील डेहराडून येथे धाड टाकून ११ जणांना अटक करण्यात आली असून, फसवणुकीसाठी वापरले जाणारे लॅपटॉप, मोबाईल फोन आणि अन्य इलेक्ट्रॉनिक साहित्य जप्त करण्यात आले आहे.

पोलिसांकडून मिळालेल्या माहितीनुसार, मानखुर्द येथील एका व्यक्तीने २७ फेब्रुवारी २०२६ रोजी पोलीस ठाण्यात तक्रार दाखल केली होती. एअर इंडियामध्ये नोकरी मिळवून देण्याचे आश्वासन देत काही अज्ञात व्यक्तींनी त्यांच्याकडून टप्प्याटप्प्याने २ लाख ५८ हजार रुपये उकळल्याचा आरोप तक्रारीत करण्यात आला होता. नोकरीसाठी अर्ज प्रक्रिया, प्रशिक्षण शुल्क, वैद्यकीय तपासणी आणि इतर विविध कारणे सांगून ही रक्कम घेतल्याचे तपासात समोर आले.

तक्रार दाखल झाल्यानंतर मानखुर्द पोलिसांनी गुन्हा नोंदवून तपास सुरू केला. तांत्रिक विश्लेषण आणि डिजिटल पुराव्यांच्या आधारे आरोपींचे धागेदोरे उत्तराखंडमधील डेहराडूनपर्यंत पोहोचले. त्यानंतर विशेष पथकाने डेहराडून येथे जाऊन संशयित ठिकाणी छापा टाकला. या कारवाईत बनावट कॉल सेंटर चालवणाऱ्या ११ आरोपींना अटक करण्यात आली. तपासादरम्यान आरोपी बेरोजगार तरुणांची माहिती विविध ऑनलाइन माध्यमांतून मिळवत असल्याचे उघड झाले आहे. त्यानंतर स्वतःला एअर इंडियाचे अधिकारी किंवा भरती विभागातील कर्मचारी असल्याचे भासवून ते तरुणांशी संपर्क साधत होते. नोकरी निश्चित असल्याचे सांगून विविध शुल्कांच्या नावाखाली पैसे उकळले जात होते.

छाप्यात पोलिसांनी अनेक लॅपटॉप, मोबाईल फोन, सिमकार्ड आणि फसवणुकीशी संबंधित कागदपत्रे जप्त केली आहेत. या साहित्याच्या आधारे देशातील इतर राज्यांमध्येही अशाच प्रकारच्या फसवणुका झाल्या आहेत का, याचा तपास सुरू आहे. अपर पोलीस आयुक्त (पूर्व प्रादेशिक विभाग) आणि पोलीस उपायुक्त, पूर्व विभाग-1 यांच्या मार्गदर्शनाखाली मानखुर्द पोलीस ठाण्याच्या विशेष पथकाने ही कारवाई केली. या रॅकेटमधील इतर साथीदारांचा शोध घेण्याचे काम सुरू असून, फसवणुकीचे संपूर्ण जाळे उघड करण्यासाठी पुढील तपास सुरू असल्याची माहिती पोलिसांनी दिली.