संजय गडदे| मुंबई, ता. १५ जून २०२४

नुकत्याच झालेल्या लोकसभा निवडणुकीत मुंबई उत्तर पश्चिम मतदारसंघातून ठाकरे गटाचे अमोल किर्तीकर यांना पराभव स्विकारावा लागला. अमोल किर्तीकरांचा शिवसेना शिंदे गटाच्या रविंद्र वायकर यांनी अवघ्या ४४ मतांनी पराभव केला.

या निकालाविरोधात अमोल किर्तीकर यांनी निवडणूक आयोगात धाव घेतली आहे. याप्रकरणी आता मोठी अपडेट समोर आली असून मतमोजणी कक्षात मोबाईल वापरल्याप्रकरणी वायकर यांच्या मेहुण्याविरोधात गुन्हा दाखल करण्यात आला आहे.

याबाबत सविस्तर माहिती अशी की, मुंबई उत्तर पश्चिम लोकसभा निवडणुकीच्या मतमोजणीत गैरप्रकार झाल्याचा आरोप करण्यात येत आहे. मतमोजणी केंद्रात मोबाईल वापरण्याची बंदी असताना शिंदे गटाचे उमेदवार रविंद्र वायकर यांच्या नातेवाईकांनी मोबाईल वापरल्याचा आरोप भरत शाह आणि सुरेंद्र अरोरा या अपक्ष उमेदवारांनी केला होता.

याप्रकरणी निवडणूक अधिकारी व पोलिसात तक्रार दाखल करण्यात आली होती. याबाबत आता मोठी अपडेट समोर आली असून रविंद्र वायकर यांचा मेहुणा मंगेश पंडीलकर याने मोबाईल वापरल्याचे उघड झाले आहे. धक्कादायक बाब म्हणजे निवडणूक आयोगाच्या कर्मचाऱ्यानेच पंडीलकरला फोन पुरवल्याचे उघड झाले आहे.

दिनेश गुरव हा निवडणूक आयोगाचा एनकोर ऑपरेटर असून त्याने वायकर यांचा मेहुणा मंगेश पंडीलकर याला मोबाईल दिल्याचे उघड झाले आहे. याप्रकरणी वनराई पोलिसात दोघांवर गुन्हा दाखल करण्यात आला आहे. अतिरिक्त सहायक निवडणूक निर्णय अधिकारी यांनी दिलेल्या तक्रारीनंतर भादवि कलम 188 नुसार गुरव यांच्या विरोधात गुन्हा दाखल करण्यात आला आहे.