Mumbai News : मुंबई येथील वरळीमध्ये मोठी दुर्घटना घडली. बांधकाम सुरू असलेल्या इमारतीच्या ४२ व्या मजल्यावरून मोठा दगड कोसळून दोघांचा जागीच मृत्यू झाला. मंगळवारी रात्री साडेआठच्या सुमारास ही घटना घडली.

मुंबईतील वरळीतील फोर सीझन रेसिडेन्सीची ही इमारत असून, बांधकाम सुरू असताना ४२ व्या मजल्यावरून मोठा दगड रस्त्यावर कोसळला. यात दोघांचा मृत्यू झाला. साबीर अली (वय ३६) आणि इम्रान अली खान (वय ३०) अशी दोघांची नावे आहेत. (Mumbai News)

हे दोघेही रस्त्यावरून जात असताना इमारतीवरून दगड कोसळला. यात ते दोघेही जखमी झाले. दुर्घटनेनंतर जवळपास अर्ध्या तासांपेक्षा जास्त वेळ हे दोघेही गंभीर अवस्थेत रस्त्यावर पडून होते. त्यांना वेळेत वैद्यकीय मदत मिळाली नाही. (Mumbai News Update)

या घटनेनंतर बघ्यांची मोठी गर्दी झाली होती. दोन्ही तरूणांचा जागीच मृत्यू झाल्याचे डॉक्टरांनी घोषित केले. या दोघांचे मृतदेह नायर रुग्णालयात विच्छेदनासाठी पाठवण्यात आले आहेत. या दुर्घटनेत दोघांचा नाहक बळी गेल्यानं परिसरातील नागरिक संताप व्यक्त करत आहेत.

या दुर्घटनेला जबाबदार असणाऱ्यांविरोधात कठोर कारवाई करण्यात यावी, अशी मागणी केली जात आहे.