साक्षी यादव, मुंबई प्रतिनिधी, साम टीव्ही मराठी

Aaditya Thackeray Amit Thackeray booked in Shivaji Park protest case : मुंबईत रविवारच्या आंदोलनाचे पडसाद उमटायला सुरुवात झाली आहे. शिवाजी पार्क परिसरातील आंदोलनावरून ठाकरे कुटुंबाच्या अडचणीत वाढ झाली आहे. अमित ठाकरे आणि आदित्‍य ठाकरे यांच्यावर मुंबई पोलिसांनी गुन्हा दाखल केला.

आंदोलकांना सोडवण्यासाठी घेतलेल्या भूमिकेनंतर शिवाजी पार्क पोलीस ठाण्यात युवासेना प्रमुख आदित्य ठाकरे आणि मनसे नेते अमित ठाकरे यांच्यासह सामाजिक कार्यकर्त्या अंजली दमानिया यांच्यावरही गुन्हे दाखल करण्यात आले आहेत.

रविवार रोजी शिवाजी पार्क परिसरात झालेल्या आंदोलनादरम्यान पोलिसांनी अनेक कार्यकर्त्यांना ताब्यात घेतले होते. या आंदोलकांना सोडवण्यासाठी आणि त्यांच्या समर्थनासाठी आदित्य ठाकरे आणि अमित ठाकरे थेट मैदानात उतरले होते. त्यांनी पोलिसांच्या कारवाईचा विरोध करत पोलिसांच्या गाड्यांवर धाव घेतली होती. याच घडामोडींच्या पार्श्वभूमीवर आता पोलिसांनी कठोर भूमिका घेत या नेत्यांवर गुन्हे दाखल केल्याची माहिती समोर आली आहे.

शिवाजी पार्क परिसरात रविवारी झालेल्या या आंदोलनादरम्यान पोलिसांनी तब्बल ३०० आंदोलकांना ताब्यात घेतले होते, ज्यांना नंतर पोलिसांनी सोडून दिले. मात्र, आता या सर्व आंदोलकांवरही गुन्हे दाखल करण्याची कायदेशीर प्रक्रिया पोलिसांकडून सुरू करण्यात आली असल्याची माहिती स्पष्ट झाली आहे.

या आंदोलनादरम्यान परिस्थिती चांगलीच तापल्याचे पाहायला मिळाले. ताब्यात घेतलेल्या आंदोलकांच्या सुटकेसाठी युवासेना प्रमुख आदित्य ठाकरे आणि मनसे नेते अमित ठाकरे थेट मैदानात उतरले होते. सेना भवन परिसरात आदित्य ठाकरेंनी ठिय्या दिला होता, तर आंदोलकांच्या सुटकेसाठी हे दोन्ही नेते शिवाजी पार्क पोलीस ठाण्यातही पोहोचले होते. या संपूर्ण घडामोडींनंतर आता ठाकरे नेत्यांसह आंदोलकांवरही गुन्ह्यांचा बडगा उगारण्यात येत आहे.