मनोज तांबे, नालासोपारा

Nalasopara Ravi Bidlan Murder Case नालासोपारामधून धक्कादायक बातमी समोर आली आहे. नालासोपारा पूर्वेतील वैतिवाडी परिसरातील एका ड्रेनेजमधून मानवी सांगाडा आढळून आला आहे. पोलीस तपासात तो सांगाडा गेल्या पाच महिन्यांपासून बेपत्ता असलेल्या कुख्यात गँगस्टर रवि बिडलान याचा असल्याची प्राथमिक ओळख पटली आहे. या प्रकरणी आचोळे पोलिसांनी पाच जणांविरोधात कट रचून हत्या करणे आणि पुरावे नष्ट केल्याचा गुन्हा दाखल केला आहे.

पोलिसांनी दिलेल्या माहितीनुसार, काही दिवसांपूर्वी आरोपींच्या एका दारू पार्टीदरम्यान रवि बिडलान याच्या हत्येबाबत चर्चा झाल्याची माहिती पोलिसांना मिळाली होती. या माहितीच्या आधारे तपास सुरू करण्यात आला. तपासादरम्यान संशयितांकडे चौकशी केल्यानंतर पोलिसांना महत्त्वाचे धागेदोरे मिळाले. त्यानंतर वैतिवाडी परिसरातील ड्रेनेज चेंबरची पाहणी करण्यात आली असता तिकडून मानवी सांगाडा आणि काही फाटलेले कपडे पोलिसांनी ताब्यात घेतले.

घटनास्थळी सापडलेल्या कपड्यांची ओळख रवि बिडलान याच्या पत्नीने केली. डीएनए तपासणीसाठी नमुने पाठवण्यात आले असून, अहवालानंतर अधिकृत पुष्टी होणार आहे. या प्रकरणात सुमित आझाद सालासार उर्फ ‘बा’ याला अटक करण्यात आली आहे. तसेच रोहन संजय जगदाळे उर्फ ‘टायगर’ याच्यासह अन्य तीन संशयितांना पोलिसांनी ताब्यात घेतले असून त्यांची कसून चौकशी सुरू आहे. आरोपींनी कट रचून रवि बिडलान यांची हत्या केल्यानंतर मृतदेहाची विल्हेवाट लावण्यासाठी तो ड्रेनेज चेंबरमध्ये टाकल्याचा पोलिसांना संशय आहे.

रवि बिडलान (Ravi Bidlan Dead) हा परिसरातील कुख्यात गुन्हेगार म्हणून ओळखला जात होता. त्याच्याविरोधात खुनाचा प्रयत्न, खंडणी, दरोडा, लूटमार, बलात्कार, बेकायदेशीर शस्त्र बाळगणे आणि मारहाण यांसारखे डझनभर गंभीर गुन्हे दाखल होते. तसेच गेल्या वर्षी त्याला पाच जिल्ह्यांतून तडीपार करण्यात आले होते. ही हत्या का करण्यात आली? याचं नेमकं कारण समोर आलं नसून पोलीस पुढील तपास करत आहेत. या घटनेमुळे नालासोपारा परिसरात खळबळ उडाली असून, तपासात आणखी धक्कादायक माहिती समोर येण्याची शक्यता व्यक्त केली जात आहे.