संजय गडदे, मुंबई प्रतिनिधी

तुम्ही देखील D-Mart सारख्या भल्या मोठ्या सुपरमार्केट्मध्ये जात असाल तर सावधान! तुमच्या मौल्यवान वस्तूंची चोरी तर होत नाही ना याकडे लक्ष द्या. कारण मुंबईतील एका d'mart मध्ये महिला ग्राहकांना लक्ष्य करून त्यांचं मौल्यवान वस्तूंची चोरी करणाऱ्या एका ठगाला पोलिसांनी बेड्या ठोकल्या आहेत. MHB पोलिसांनी या आरोपीची ओळख बपी रतन भट्टाचार्य (53) अशी जाहीर केली आहे. तो गर्दीचा गैरफायदा घेत शॉपिंग ट्रोलीमध्ये ठेवलेल्या पर्स, रोख रक्कम, ATM कार्ड्स आणि कागदपत्रे चोरत असल्याचे उघड झाले आहे.

भट्टाचार्यला शनिवारी मीरारोड येथून अटक करण्यात आली. पोलिसांच्या माहितीनुसार, आरोपी हा हॅबिच्युअल ऑफेंडर असून मुंबईतील विविध D-Mart शाखांमधील १० पेक्षा अधिक चोरीच्या घटनांमध्ये त्याचा सहभाग आढळला आहे. सध्या आरोपी एम एच बी कॉलनी पोलिसांच्या ताब्यात असून आरोपीने अशा प्रकारे अजून कुठे सूर्या केल्या आहेत किंवा इतर काही गुन्हे केले आहेत का? याबाबतचा तपास पोलीस करत आहेत.

अलीकडील प्रकरणात, दहिसर पश्चिम येथील एका महिलेची D-Mart कंदरपाडा येथे खरेदीदरम्यान पर्स चोरी झाली होती. त्यानंतर काही मिनिटांतच तिच्या पतीच्या खात्यातून २०,००० रुपयांची रक्कम चोरीच्या ATM कार्डद्वारे काढण्यात आली. CCTV फुटेज आणि तांत्रिक तपासावरून आरोपीची हालचाल शोधून काढत DCP संदीप जाधव यांच्या मार्गदर्शनाखालील तपास पथकाने त्याला अटक केली.

तपासादरम्यान भट्टाचार्यने अशाच प्रकारे केलेल्या अनेक चोरींची कबुली दिली आहे. पोलिसांनी सांगितले की, मुंबई परिसरात त्याच्यावर १० हून अधिक गुन्हे नोंद आहेत, आणि सुपरमार्केटमध्ये चोरीची तक्रार आली की सर्वात आधी त्याच्यावर संशय घेतला जातो. आरोपीवर BNS आणि IT Act अंतर्गत गुन्हे नोंदवण्यात आले असून, इतर चोरीच्या घटनांचा तपास सुरू आहे.