Mumbai Local Train : मध्य रेल्वेच्या दोन सतर्क महिला तिकीट तपासणीसांमुळं एका १९ वर्षीय तरुणीचा जीव वाचला. शनिवारी ही घटना घडली. ही तरुणी घणसोली येथील एका कंपनीत नोकरी करते. घरी परतत असताना धावत्या लोकलमध्ये तिच्या छातीत अचानक दुखू लागलं. त्याचवेळी लोकलच्या डब्यात तिकीट तपासणी करणाऱ्या दोन महिला टीसी देवदूतासारख्या धावून आल्या आणि तिचा जीव वाचवला.

मिळालेल्या माहितीनुसार, मध्य रेल्वेच्या ट्रान्सहार्बर मार्गावर धावत्या लोकलमध्ये हा प्रकार घडला. घणसोली येथील एका कंपनीत नोकरी करणारी १९ वर्षीय तरुणी लोकलमधून प्रवास करत होती. ती बसलेल्या डब्यातच महिला टीसीदेखील होत्या. त्या प्रवाशांकडे तिकीट तपासणी करत होत्या.

मिळालेल्या माहितीनुसार, ट्रान्स हार्बर रेल्वे मार्गावर शनिवारी साधारण दीड वाजताच्या सुमारास ही घटना घडली. तरुणी कर्जतला राहते. घणसोलीहून ती आपल्या घरी परतत होती. घरी जाण्यासाठी ती ठाण्याकडे जाणाऱ्या लोकलमध्ये बसली होती. ऐरोली सोडल्यानंतर काही मिनिटांत तिच्या छातीत दुखायला लागले.

महिला टीसी दीपा वैद्य आणि जैन मर्सिला या लोकलच्या त्याच डब्यात प्रवाशांकडील तिकीट तपासणी करत होत्या. या तरुणीच्या छातीत दुखू लागल्याचे त्यांनाही सहप्रवाशांनी सांगितले. त्यांनी क्षणाचाही विलंब न करता मदतीला धावून गेल्या. त्यांनी तात्काळ ठाणे रेल्वे स्थानकात कळवून वैद्यकीय मदतीसाठी तयार राहण्यास सांगितले.

ठाणे स्थानकात ट्रेन पोहोचल्यानंतर आम्ही तातडीने तिला फलाट क्रमांक १ वर असलेल्या मेडिकल क्लिनिकमध्ये नेले. तिची प्रकृती अधिकच गंभीर असल्याने तिला पुढील उपचारासाठी रेल्वे पोलिसांच्या मदतीने सिव्हिल हॉस्पिटलमध्ये नेले.

तरुणीला हृदयविकाराचा सौम्य झटका आला होता, असे रेल्वेच्या वरिष्ठ अधिकाऱ्यांकडून सांगण्यात आले. रेल्वेकडून तरुणीच्या कुटुंबीयांना कळवण्यात आले. त्यांनी तातडीने हॉस्पिटलमध्ये धाव घेतली. तरुणीच्या आईने मुलीचा जीव वाचवणाऱ्या महिला टीसींचे आभार मानले.