मुंबईची लाईफलाइन म्हणून ओळखल्या जाणाऱ्या लोकल ट्रेनमधील प्रवाशांच्या सुरक्षेचा प्रश्न पुन्हा एकदा ऐरणीवर आलाय. चर्चगेटहून विरारच्या दिशेने जाणाऱ्या फास्ट लोकलमध्ये गुरुवारी रात्री साडेदहाच्या सुमारास प्रवाशांमध्ये जोरदार हाणामारी झाली. या वादादरम्यान एका प्रवाशाने चालत्या ट्रेनमधून उडी मारली. सुदैवाने त्यावेळी ट्रेन मुंबई सेंट्रल स्थानकाच्या प्लॅटफॉर्मवरून जात होती. ट्रेनचा वेग कमी असल्याने मोठा अनर्थ टळला.

ट्रेनच्या दरवाजात उभं राहण्यावरून वाद

मिळालेल्या माहितीनुसार, ग्रँट रोड आणि मुंबई सेंट्रल रेल्वे स्थानकादरम्यान ट्रेनच्या दरवाजात उभं राहण्यावरून दोन प्रवाशांमध्ये वाद झाला. सुरुवातीला झालेल्या शाब्दिक वादाचं काही वेळातच हाणामारीत रूपांतर झालं. दोघांमध्ये चालत्या लोकलमध्ये जोरदार मारामारी सुरू झाली. दरम्यान हा सुरु असानाच एकाने ट्रेनमधून थेट खाली उडी मारली आणि तो पळून गेला.

हाणामारीचा व्हिडिओ सोशल मीडियावर व्हायरल

या प्रकारामुळे लोकलमधील इतर प्रवाशांमध्ये गोंधळ उडाला. या घटनेचा व्हिडिओ सध्या सोशल मीडियावर वेगाने व्हायरल होताना दिसतोय. व्हिडिओमध्ये लोकल ट्रेनमध्ये दोन प्रवासी एकमेकांशी मारामारी करताना दिसत आहेत

मुंबई लोकलमध्ये आधीच मोठ्या प्रमाणात गर्दी असते. त्यात प्रवाशांमध्ये होणारे वाद आणि हाणामारीच्या घटनांमुळे प्रवाशांच्या सुरक्षेचा प्रश्न निर्माण होतंय. या घटनेमुळे पुन्हा एकदा लोकलमधील प्रवाशांची सुरक्षा आणि रेल्वे प्रशासनाच्या व्यवस्थेवर प्रश्न उपस्थित केले जात आहेत.

काही महिन्यांपूर्वी लोकलमध्ये चाकूने वार करून तरुणाची हत्या

मुंबई लोकलमधील मारामारीची ही पहिलीच घटना नाही. काही महिन्यांपूर्वी लोकल ट्रेनमध्ये चाकूने वार करून एका तरुणाची हत्या करण्यात आली होती. मयंक लोहार असं मृत तरुणाचं नाव होतं.

त्या दिवशी जोरदार पाऊस सुरू होता. पावसाचं पाणी लोकल ट्रेनच्या आत येत होतं. याचदरम्यान दरवाजा बंद करण्यावरून मयंक लोहार आणि आरोपीमध्ये वाद झाला. हा वाद वाढल्यानंतर आरोपीने रागाच्या भरात आपल्या बॅगेतून चाकू काढला आणि मयंकवर हल्ला केला. या हल्ल्यात मयंकचा मृत्यू झाला.

या घटनेनंतर आता पुन्हा एकदा लोकल ट्रेनमधील प्रवाशांमधील वाद आणि मारामारीचा प्रकार समोर आला आहे. त्यामुळे मुंबई लोकलमधून प्रवास करणाऱ्या प्रवाशांच्या सुरक्षेचा मुद्दा पुन्हा चर्चेत आला आहे.