कांदिवली पूर्व येथील समतानगर पोलीस ठाण्याच्या हद्दीतील दामूनगर परिसरात १७ वर्षीय तरुणीची निर्घृण हत्या झाल्याची धक्कादायक घटना उघडकीस आली आहे. या प्रकरणी पोलिसांनी अवघ्या काही तासांत तपासाची चक्रे फिरवत प्रियकराला अटक केली आहे. प्रेमसंबंध आणि लग्नाच्या वादातून ही हत्या झाल्याची प्राथमिक माहिती पोलिसांनी दिली आहे.

शुक्रवारी सकाळी सुमारे ११ वाजण्याच्या सुमारास दामूनगरमधील डोंगर परिसरात एका अज्ञात तरुणीचा मृतदेह आढळल्याची माहिती समतानगर पोलिसांना मिळाली. त्यानंतर पोलीस, गुन्हे शाखा आणि फॉरेन्सिक पथक घटनास्थळी दाखल झाले. घटनास्थळाचा पंचनामा करून फॉरेन्सिक पद्धतीने तपास सुरू करण्यात आला.

तपासादरम्यान मृत तरुणीची ओळख पटली असून पोलिसांनी सीसीटीव्ही फुटेज, मोबाईल कॉल डिटेल्स, लोकेशन आणि अन्य तांत्रिक पुराव्यांच्या आधारे संशयित सूरज वाघमारे (वय २२, रा. कांदिवली पूर्व) याला ताब्यात घेतले. चौकशीनंतर त्याला अटक करण्यात आली.

पोलिसांच्या प्राथमिक माहितीनुसार,अल्पवयीन मुलगी ही सूरजकडे लग्न करण्याचा आग्रह धरत होती. या वादातून आरोपीने तिच्या गळ्यावर चाकूने वार केला, ज्यात तिचा मृत्यू झाला. या प्रकरणाचा पुढील तपास समतानगर पोलीस करत आहेत.