सचिन कदम, रायगड

मुंबई–गोवा महामार्गावरील काम रखडलेलं असताना देखील प्रशासनाने टोल वसुली सुरू केल्याचे समोर आले आहे. तब्बल १७ वर्षांपासून सुरू असलेल्या चौपदरीकरणाच्या कामाला अजूनही पूर्णविराम मिळालेला नाही. अनेक ठिकाणी रस्त्यांची अवस्था दयनीय असून काही महत्त्वाची कामे अद्याप अर्धवटच आहेत. तरी देखील प्रशासनाकडून टोल आकारल्यामुळे प्रवासी आणि स्थानिक नागरिकांमध्ये तीव्र नाराजी पसरली आहे.

नागोठणे आणि कोलाड येथील उड्डाणपूल, सुकेळी खिंड परिसरातील रस्त्याचे काम, तसेच माणगाव आणि इंदापूर येथील बायपास मार्गांचे बांधकाम अद्याप पूर्ण झालेले नाही. याशिवाय सर्व्हिस रोडची कामेही अपूर्ण अवस्थेत असल्याने स्थानिकांना मोठ्या अडचणींना सामोरे जावे लागत आहे. पावसाळ्यात तर परिस्थिती अधिकच बिकट होते.

दरम्यान, पनवेल आणि पेण दरम्यान असलेल्या खारपाडा टोल नाक्यावर प्रशासनाने अचानक टोल वसुली सुरू केली आहे. रस्त्याचे काम पूर्ण झालेले नसताना आणि अधिकृत लोकार्पणही न झालेल्या परिस्थितीत टोल आकारणी सुरू झाल्याने संताप व्यक्त केला जात आहे. या मार्गावर कायमस्वरूपी वाहतूककोंडी असते.

विशेषतः सुट्ट्यांच्या दिवशी आणि पर्यटन हंगामात या महामार्गावर तासंतास ट्रॅफिक जॅम होत असल्याने प्रवाशांना प्रचंड मनस्ताप सहन करावा लागतो. “रस्ता पूर्ण करा, मगच टोल घ्या” अशी ठाम भूमिका प्रवाशांनी घेतली आहे.दरम्यान प्रशासन काय निर्णय घेईल याकडे सर्वांचे लक्ष लागले आहे.