Dadar News: मुंबईच्या दादर शहरातून आगीची एक मोठी बातमी समोर आली आहे. काल (मंगळवार) रात्री दादरमधील एका फर्निचरच्या दुकानाला भीषण आग लागली. या घटनेत लाखोंचा माल जळून खाक झाला आहे. अग्निशमन दलाच्या ५ वाहनांच्या मदतीने आग आटोक्यात आणण्यात यश आले आहे. (Fire News)

मिळालेल्या अधिक माहितीनुसार, या घटनेत कोणीही जखमी झाले नाही. शॉर्टसर्किटमुळे आग लागल्याचे प्राथमिक तपासात निष्पन्न झाले आहे. आग लागली तेव्हा दुकान बंद असल्याने ही गोष्ट पटकन कुणाच्या लक्षात आली नाही. रात्री उशिरा दुकानातून धूर निघताना दिसताच स्थानिक नागरिकांनी पोलीस आणि अग्निशमन दलाला माहिती दिली.

सुमारे 1 तासाच्या अथक परिश्रमानंतर आग आटोक्यात आणता आली. मात्र धुराचे लोट हवेत दूरवर पसरल्याने अग्निशमन दलाला आग विझवण्यास बराच वेळ लागला. स्थानिक पोलीस आणि अग्निशमन दलाचे पथक आगीच्या कारणाचा शोध घेत आहे.

मुंबईत (Mumbai) आगीच्या घटनांचे प्रमाण वाढताना दिसत आहे. २५ मार्च रोजी मुंबई पुणे एक्सप्रेस वेवर ट्रकला भीषण आग लागल्याची घटना घडली होती. ही आग एवढी भीषण होती की त्यात ट्रक पूर्णपणे जळून खाक झाला. ट्रकला आग लागली तेव्हा खूप उंचीपर्यंत धुराचे लोट दिसत होते. या घटनेचा व्हिडिओ देखील समोर आला होता.