मयूर राणे, साम टीव्ही

मुंबई : मुंबईच्या धारावीत गोळीबाराची घटना घडली आहे. धारावीच्या मुस्लिमनगरमध्ये एका तरुणीवर गोळीबार झाला. या गोळीबारात तरुणी जखमी झाली. गोळीबाराच्या घटनेने परिसरात खळबळ उडाली आहे.

मिळालेल्या माहितीनुसार, मुंबईच्या धारावीतील मुस्लिमनगरमध्ये एका ३२ वर्षीय तरुणीवर गोळीबार झाल्याची घटना घडली. सर्वर बानू शेख नावाच्या तरुणीवर गोळीबार झालाय. या घटनेत तरुणी जखमी झाली आहे. रात्रीच्या सुमारास तरुणी घराजवळ उभी असताना तिच्या दंडावर अचानक काही तरी आघात झाल्याने महिला जखमी झाली.

जखमी झालेल्या तरुणीला तातडीने सायन रुग्णालयात दाखल केलं. रुग्णालयात दाखल केल्यानंतर तरुणीच्या दंडात गोळी घुसल्याचं निष्पन्न झालं. या प्रकरणी शाहू नगर पोलीस ठाण्यात अज्ञाताविरोधात हत्येचा प्रयत्न केल्याप्रकरणी गुन्हा नोंदवण्यात आला आहे.

महिला सुरक्षेचा प्रश्न ऐरणीवर

राज्यासहित मुंबईतही गेल्या काही महिन्यांपासून महिला अत्याचाराच्या घटनेत वाढ झाली आहे. वाढत्या महिला अत्याचारादरम्यान एका तरुणीवर गोळीबाराची घटना घडली आहे. तरुणीवर नेमकं कुणी गोळीबार केला, याची माहिती हाती आलेली नाही. पोलिसांनी या प्रकरणी गुन्हा नोंदवून तपासाला सुरुवात केली आहे. तरुणीवर गोळीबार झाल्याने धारावी परिसरात खळबळ उडाली आहे.

दरम्यान, काही दिवसांपूर्वी पुणे जिल्ह्यातील दौंड येथील कला केंद्रात गोळीबाराची घटना घडली होती. आमदार शंकर मांडेकर यांच्या सख्ख्या भावाने गोळीबार केला होता. या गोळीबारात कोणीही जखमी झालं नव्हतं. या प्रकरणी तिघांना ताब्यात घेण्यात आलं आहे.