राजधानी मुंबईत दहीहंडी उत्सव शिगेला पोहोचला आहे. सर्वत्र मोठा जल्लोष पाहायला मिळत आहे. १० थरांचे उंच मनोरे पाहायला मिळत आहे. या उत्सवाचा जल्लोष द्विगुणित करण्यासाठी मुख्यमंत्री देवेंद्र फडणवीसांसह अनेक राजकीय नेते दहीहंडी उत्सवात सहभागी झाले आहेत. मात्र, या उत्सवाला गालबोट लागणारी घटना घडली आहे. मुंबईत दहीहंडी उत्सवात आतापर्यंत ३० गोविंदा जखमी झाले आहेत. तसेच मानखूर्दमध्ये एका गोविंदाचा दुर्देवी मृत्यू झाला आहे.

मुंबईत दहीहंडी उत्सवात ३० गोविंदा जखमी

दहीहंडी उत्सवात आतापर्यंत एकूण ३० गोविंदा जखमी झाले असल्याची माहिती समोर आली आहे. विविध सरकारी तसेच बीएमसी रूग्णालयात जखमी गोविंदांवर उपचार सुरू आहेत. १५ गोविंदांवर खासगी आणि सरकारी रूग्णालयात उपचार सुरू आहेत. तर, १५ गोविंदांना उपचारानंतर घरी सोडण्यात आले आहे.

मिळालेल्या माहितीनुसार, सायन रूग्णालयात १८, KEM रूग्णालयात ६ आणि नायर रूग्णालयात ६ गोविंदांवर उपचार सुरू आहेत, अशी माहिती संबंधित अधिकाऱ्यांनी दिली आहे.

मुंबईच्या मानखूर्दमध्ये एका गोविंदाचा दुर्देवी मृत्यू झाला आहे. जगमोहन शिवकिरण चौधरी (वय वर्ष ३२) या तरूणाचा दहीहंडीसाठी दोरी बांधताना तोल गेला आणि थेट खाली कोसळला. या दुर्घटनेनंतर त्याला तातडीने जखमी अवस्थेत रूग्णालयात नेण्यात आले. मात्र, उपचारापूर्वीच डॉक्टरांनी तरूणाला मृत घोषित केले.

तरूणाच्या मृत्यूनंतर उत्सवाला गालबोट लागला असून, चौधरी कुटुंबावर दुखा:चा डोंगर कोसळला आहे. या घटनेनंतर परिसरात खळबळ उडाली आहे.