दादर येथील कबूतर खाना परिसर पुन्हा एकदा राजकीय आणि सामाजिक वादाच्या केंद्रस्थानी आला आहे. कबुतर खानावर काही दिवसांपूर्वी ताडपत्री टाकण्यात आली होती. मात्र जैन समाजाकडून या निर्णयावर विरोध दर्शवण्यात आला होता. असं असलं तरी पुन्हा एकदा रात्री उशिरा मुंबई महापालिकेकडून कबुतर खानावर ताडपत्री बसवण्यात आली आहे.

सर्वोच्च न्यायालयाने अलीकडेच दिलेल्या आदेशानुसार कबूतर खान्यात कबुतरांना धान्य दिल्यास ते गुन्हा मानले जाईल, असे स्पष्ट करण्यात आले आहे. या आदेशानंतर जैन समाजाकडून तीव्र प्रतिक्रिया उमटत असून कबूतर खान्यावर ताडपत्री टाकण्याच्या महापालिकेच्या कृतीविरोधात समाज आक्रमक झालेला दिसून येतो. काही दिवसांपूर्वी मुंबई महानगरपालिकेने कबूतर खान्यावर ताडपत्री टाकली होती मात्र जैन समाजातील कार्यकर्त्यांनी ती तातडीने काढून टाकत आपला विरोध नोंदवला होता.

मात्र या प्रकरणात नव्या घडामोडी घडल्या असून रात्री उशिरा मुंबई महापालिकेने पुन्हा एकदा कबूतर खान्यावर ताडपत्री टाकण्याचे पाऊल उचलले आहे. या पार्श्वभूमीवर जैन समाजाकडून संभाव्य आक्रमक प्रतिक्रिया टाळण्यासाठी मुंबई पोलिसांनी परिसरात मोठा बंदोबस्त तैनात केला आहे. पोलिसांच्या उपस्थितीमुळे वातावरण तणावपूर्ण असले तरी परिस्थिती नियंत्रणात ठेवण्याचा प्रयत्न सुरू आहे.

जैन समाजाच्या मते, कबुतरांना धान्य देणे ही त्यांच्या धार्मिक परंपरेचा भाग असून, ते सुरू ठेवण्याचा त्यांचा निर्धार आहे. एकीकडे ते कबुतरांना धान्य देण्याची मुभा मिळावी यासाठी प्रयत्न करत असताना दुसरीकडे त्यांच्या मंदिरांवर जाळ्या लावण्याचे कामही सुरू आहे. जेणेकरून कबुतरांचा वावर मंदिरांच्या आत कमी होईल. या दुहेरी भूमिकेबाबत अनेकांच्या भुवया उंचावल्या आहेत.

या संपूर्ण प्रकरणामुळे स्थानिक पातळीवर तणाव वाढत असून महापालिका, पोलिस प्रशासन आणि जैन समाज यांच्यातील संघर्ष आणखी चिघळण्याची शक्यता वर्तवली जात आहे. पुढील काही दिवसांत न्यायालयाच्या आदेशाची अंमलबजावणी आणि जैन समाजाच्या भूमिका यांचा तोल कसा साधला जातो याकडे सर्वांचे लक्ष लागले आहे.