Mumbai Crime News : बदलापूर येथील अत्याचाराच्या घटनेमुळे राज्यात संताप व्यक्त करण्यात येत आहे. आशाचत आता मुंबईजवळच्या नालासोपारा (Mumbai Nalasopara Crime) येथे थरकाप उडवणारी घटना घडली आहे. नालासोपाऱ्यात १७ वर्षीय अल्पवयीन (Crime) मुलीवर सामुहिक अत्याचार झाले आहेत. पोलिसांनी दोन्ही आरोपींना बेड्या ठोकल्या आहेत.

मुंबईच्या पश्चिम उपनगरात राहणारी १७ वर्षीय पिडीत मुलीची एक मैत्रीण नालासोपार्‍यात राहते. तिला भेटण्यासाठी ती अधूनमधून नालासोपार्‍याला यायची. मैत्रीणीच्या घराशेजारी असणाऱ्या एका फोटो स्टुडियोत काम करणार्‍या तरुणाची तिची मागच्या आठवड्यात ओळख झाली होती. गुरुवारी २५ वर्षीय सोनू नामक तरूणाने तिला भेटण्यासाठी बोलावले. त्यानुसार पीडित नालासोपारा स्थानकात आली. यावेळी आरोपी सोबत त्याचा मित्र होता. फिरण्याच्या बहाण्याने ते तिला रिक्षातून घेऊन गेले. काही वेळाने तिला नगीनदासपाडा येथील एका निर्जनस्थळी आणले. तेथे आळीपाळीने दोघांनी तिच्यावर अत्याचार केला. यानंतर त्या मुलीने घरी जाऊन आपल्या पालकांना हा प्रकार सांगितला.

तुळीज पोलिसांनी दोन्ही आरोपींवर पोक्सो अंतर्गत बलात्काराचा गुन्हा दाखल केला आहे. आरोपी आणि मुलीची केवळ ४-५ दिवसांची ओळख होती. तिला फिरवण्याच्या बहाण्याने बोलावून तिच्यावर अत्याचार करण्यात आला आहे. याप्रकरणी आम्ही दोन्ही आरोपींना अटक केली आहे. अशी माहिती तुळीज पोलीस ठाण्याचे वरिष्ठ पोलीस निरीक्षक शैलेंद्र नगरकर यांनी दिली. पोलीस याप्रकरणाचा कसून तपास करत आहेत.