११ वर्षांच्या मुलावर लैंगिक अत्याचार करणाऱ्या आरोपीला कोर्टाने १२ वर्षांच्या तुरुंगवासाची शिक्षा सुनावली आहे. २०१७ मध्ये ही घटना घडली होती. आरोपीने आपल्या नातेवाईकाच्या ११ वर्षांच्या मुलावर लैंगिक अत्याचार आणि छळ केला होता. आरोपीविरोधात पोक्सो कायद्याअंतर्गत गुन्हा दाखल करण्यात आला होता. या प्रकरणाच्या सुनावणीदरम्यान कोर्टाने आरोपीला कठोर शिक्षा सुनावली. आरोपीला १२ वर्षांच्या सश्रम कारावासाची शिक्षा सुनावण्यात आली.

मिळालेल्या माहितीनुसार, विशेष पोक्सो न्यायालयाने २१ ऑगस्ट रोजी एका ५५ वर्षीय व्यक्तीला अल्पवयीन मुलाचा लैंगिक छळ केल्याच्या प्रकरणामध्ये १२ वर्षांच्या तुरुंगवासाची शिक्षा सुनावली. आरोपीने मज्जातंतूचा विकार असलेल्या आपल्या ११ वर्षांच्या पुतण्याचे लैंगिक शोषण केले होते याप्रकरणात त्याला दोषी ठरवण्यात आले. आरोपी कांदिवलीचा रहिवासी आहे.

'आरोपी त्याच्या मूळ इच्छा आणि प्रवृत्तीला बळी पडला होता आणि पीडित मुलगा आजारी आहे आणि तो त्याच्या नातेवाईक आणि मित्राचा मुलगा आहे याची काळजीही त्याने घेतली नाही. त्यामुळे आरोपीने केलेले कृत्य हे पीडित मुलाच्या वडिलांनी त्याच्यावर ठेवलेल्या विश्वासाचा स्पष्टपणे गैरवापर करणारे होते.' असे म्हणत कोर्टाने आरोपीला कठोर शिक्षा सुनावली.

आरोपी मुलाच्या कुटुंबासोबत कांदिवली येथे राहत होता. १६ मार्च २०१७ रोजी पीडित मुलाने आरोपीने केलेल्या कृत्याची माहिती आपल्या वडिलांना दिली. पीडित मुलाच्या वडिलांनी आरोपीला जाब विचारला असता त्याने हे सर्व आरोप खोटे असल्याचे सांगत त्यांना मारहाण केली. असे असताना देखील पीडित मुलाच्या वडिलांनी आरोपीला इशारा दिला आणि आपल्या मुलापासून दूर राहण्यास सांगितले.

असे असताना देखील आरोपीने चार दिवसांनंतर पुन्हा ११ वर्षांच्या या मुलाचा लैंगिक छळ केला. त्यानंतर पीडित मुलाच्या वडिलांनी समता नगर पोलिस ठाण्यात तक्रार दाखल केली. पोलिसांनी भारतीय दंड संहिता आयपीसीच्या कलम ३७७ अंतर्गत अनैसर्गिक लैंगिक संबंध आणि लैंगिक अत्याचारापासून मुलांचे संरक्षण कलम ६ आणि १२ नुसार आरोपीविरोधात गुन्हा दाखल केला होता.