मयूर राणे, मुंबई

मुंबईमध्ये भरदिवसा गोळीबाराची घटना घडली. कुर्ल्यातील हलाव पुलाजवळ एका तरुणावर गोळ्या झाडण्यात आल्या. दुचाकीवरून आलेल्या आरोपींनी तरुणावर ३ गोळ्या झाडल्या. या गोळीबारामध्ये तरुण गंभीर जखमी झाला असून त्याला उपचारासाठी रुग्णालयात हलवण्यात आले आहे. दोन गटातील वादातून ही गोळीबाराची घटना घडली. घटनेची माहिती मिळताच पोलिसांनी घटनास्थळी धाव घेतली असून तपास सुरू केला आहे.

मिळालेल्या माहितीनुसार, व्ही. बी. नगर पोलिस ठाण्याच्या हद्दीत गोळीबाराची घटना घडली. मकडवाला कंपाउंड येथील हलाव पुलाजवळ तरुणावर गोळ्या झाडण्यात आल्या. आज दुपारी सुमारे १२:४० वाजताच्या सुमारास ही घटना घडली. पूर्ववैमनस्यातून विनोद मल्लाप्पा पवार (वय ४० वर्षे) यांच्यावर आरोपींनी गोळ्या झाडल्या. गोळीबारानंतर आरोपींनी पळ काढला. दिवसाढवळ्या घडलेल्या या गोळीबाराच्या घटनेन कुर्ला परिसर हादरून गेला. परिसरातील नागरिकांमध्ये भीतीचे वातावरण आहे.

विनोद पवारवर ३ गोळ्या झाडण्यात आल्या. या गोळीबारात तो गंभीर जखमी झाला आहे. जखमी झालेल्या विनोदला उपचारासाठी रुग्णालयात हलवण्यात आले. विनोदची प्रकृती गंभीर आहे. घटनेची माहिती मिळताच व्ही. बी. नगर पोलिस ठाण्याचे अधिकारी आणि इतर पथके घटनास्थळी दाखल झाली आहेत. पोलिस सध्या आरोपींचा शोध घेत आहेत. परिसरातील सीसीटीव्ही फूटेज तपासले जात आहेत.