मुंबईमध्ये ४ वर्षांच्या मुलीवर लैंगिक अत्याचार करण्यात आल्याची धक्कादायक घटना समोर आली आहे. गोरेगावच्या एका नामांकित शाळेमध्ये ही मुलगी शिक्षण घेते. या प्रकरणी पीडित मुलीच्या शाळेमधील केअर टेकर महिलेला पोलिसांनी अटक केली. या घटनेमुळे मुंबईत खळबळ उडाली असून शाळकरी मुलींच्या सुरक्षिततेचा प्रश्न देखील ऐरणीवर आला आहे.

मिळालेल्या माहितीनुसार, पीडित मुलीला तिची आजी शाळेमध्ये सोडण्यासाठी गेली होती. शाळा सुटल्यानंतर आजी परत तिला आणण्यासाठी गेली. घरी आल्यानंतर कपडे बदलत असताना आजीला मुलीच्या अंगावर काही जखमा दिसून आल्या. तसंच मुलगी सतत त्रास होतोय असं म्हणत होती. त्यामुळे तिची आजी खूपच घाबरली. मुलीसोबत काही तरी भयंकर घडलं असल्याचा अंदाज तिच्या आजीला आला.

पीडित मुलीच्या आजीने तिच्या आई-वडिलांना ही गोष्ट सांगितली. त्यांनी पीडित मुलीला तात्काळ रुग्णालयात नेलं. डॉक्टरांनी तपासणी करून मुलीवर लैंगिक अत्याचार झाल्याचे सांगितले. त्यानंतर पीडित मुलीच्या आई-वडिलांनी थेट गोरेगाव पोलिस ठाण्यात धाव घेत तक्रार दाखल केली. पोलिसांनी घटनेचे गांभीर्य लक्षात घेऊन या प्रकरणी गुन्हा दाखल केला.

पोलिसांनी तपास करून शाळेत काम करणाऱ्या एका ४३ वर्षीय केअर टेकर महिलेला अटक केली. या महिलेची सध्या चौकशी सुरू आहे. तिने या मुलीसोबत नेमकं काय केलं? यामध्ये तिचा काय सहभाग आहे? याचा तपास पोलिस करत आहेत. या महिला कर्मचारीची नेमकी भूमिका काय हे अद्याप स्पष्ट झाले नाही. शाळेतील आणखी तीन महिला कर्मचाऱ्यांची या प्रकरणी चौकशी करण्यात आली आहे.