सूरज मसुरकर, मुंबई|ता. १८ मे २०२४

चार दिवसांपूर्वी मुंबईच्या घाटकोपरमध्ये होर्डिंग कोसळून मोठी दुर्घटना घडली. या दुर्घटनेत १६ जणांना जीव गमवावा लागला तर जवळपास ८४ जण गंभीर जखमी झालेत. या धक्कादायक प्रकरणानंतर अवैध होर्डिंग्स विरोधात कारवाईचा बडगा उगारला आहे. अशातच घाटकोपर दुर्घटनेतील ईगो मीडिया कंपनीचे दादर परिसरात आणखी ८ अनधिकृत होर्डिंग्स असल्याचे समोर आले आहे.

याबाबत सविस्तर माहिती अशी की, घाटकोपर दुर्घटनेत कोसळलेले जाहिरातीचे होर्डिंग्स हे इगो मीडिया कंपनीचे असल्याचे समोर आले होते. याप्रकरणी इगो मीडिया होर्डिंग कंपनीचा मालक भावेश भिंडे याला अटक करण्यात आली आहे. अशातच याच कंपनीचे आणखी आठ अवैध फलक असल्याचे समोर आले आहे.

इगो मीडिया या जाहिरात कंपनीचे दादरच्या टिळक पूल परिसरात आठ अनधिकृत फलक आहेत. आठ फलकांपैकी एका फलकाची लांबी ही तब्बल 80 आणि रुंदी 100 फूट आहे. धक्कादायक म्हणजे या सर्व फलकांना पालिकेची परवानही नाही याप्रकणी महापालिकेने रेल्वे प्रशासनाला नोटीस पाठवली असून हे आठही फलक तीन दिवसात काढून टाकावेत अन्यथा पालिका कारवाई करुन त्याचा खर्च रेल्वे कडून वसूल करेल, असा इशारा देण्यात आला आहे.

दरम्यान, घाटकोपरमधील दुर्घटनेनंतर महाराष्ट्र शासनाने अवैध होर्डिंग्स विरोधात कारवाई सुरू केली आहे. आज यासंबंधी राज्य सरकारच्या महसूल व वनविभागाने मोठा निर्णय घेतला असून सर्व जिल्हधिकाऱ्यांना शासकीय जागांवरील अवैध होर्डिंगवर कारवाईचे आदेश देण्यात आले आहेत.