Summary -

• मुंबईत एफडीएची मोठी कारवाई

• ११ हजार लिटरपेक्षा जास्त दूध जप्त

• ६ नमुने निकृष्ट आणि १ नमुना धोकादायक

• असुरक्षित दूध तात्काळ नष्ट करण्यात आले

संजय गडदे, मुंबई

मुंबईकरांसाठी महत्वाची बातमी आहे. मुंबईमध्ये एफडीएने मोठी कारवाई केली. ११ हजार लिटरहून अधिक दूध जप्त करण्यात आले. मुलुंड, ऐरोली, मानखुर्द, दहिसर आणि शिवडी येथे एफडीएने कारवाई केली. एकूण १९५ दुधाचे नमुने तपासणीसाठी ताब्यात घेण्या आले आहेत. १८८ नमुने सुरक्षित असून ६ निकृष्ट तर १ नमुना धोकादायक आढळून आला. त्यानंतर एफडीएने ९० लिटर असुरक्षित दूध तात्काळ नष्ट केले. एफडीएकडून मुंबईत येणाऱ्या दूध वाहतूक वाहनांची टोलनाक्यांवरच तपासणी केली जात आहे.

मिळालेल्या माहितीनुसार, नागरिकांना सुरक्षित आणि दर्जेदार दूध मिळावे यासाठी अन्न व औषध प्रशासनने मुंबई आणि उपनगरांमध्ये विशेष तपास मोहीम राबवली. या कारवाईदरम्यान मुंबईत येणाऱ्या दूध वाहतूक करणाऱ्या वाहनांची प्रमुख टोलनाक्यांवर तपासणी करण्यात आली. ही मोहीम रात्रीच्या वेळेत राबवण्यात आली. मुलुंड (आनंद नगर), मुलुंड (LBS रोड), ऐरोली, मानखुर्द, दहिसर आणि शिवडी या सहा प्रवेश ठिकाणी FDA च्या पथकांनी तपासणी केली.

तपासणीदरम्यान अधिकाऱ्यांनी एकूण १९५ दुधाचे नमुने घेतले. त्यापैकी १८८ नमुने सुरक्षित आढळले, ६ नमुने निकृष्ट दर्जाचे होते तर १ नमुना आरोग्यास अपायकारक असल्याचे आढळले. तसेच पुढील कारवाईसाठी आणखी ७ नमुने तपासणीसाठी पाठवण्यात आले. या कारवाईत एकूण ११,०८०.५ लिटर दूध जप्त करण्यात आले. निकृष्ट दर्जाचे दूध सील करून उत्पादकांकडे परत पाठवण्यात आले. तर सुमारे ९० लिटर असुरक्षित दूध तात्काळ नष्ट करण्यात आले.

FDA ने सांगितले की, नागरिकांच्या आरोग्याच्या सुरक्षेसाठी अशा प्रकारच्या मोहिमा पुढेही सुरू राहतील. अन्न सुरक्षा आयुक्त श्रीधर दुबे पाटील यांनी नागरिकांना संशयास्पद किंवा असुरक्षित अन्नपदार्थ आढळल्यास FDA ला माहिती देण्याचे आवाहन केले आहे. ही कारवाई वरिष्ठ अधिकाऱ्यांच्या मार्गदर्शनाखाली करण्यात आली असल्याचेही सांगण्यात आले.